გირჩის ლიდერი ზურაბ ჯაფარიძე აუდიტორია 115-ის მიერ გუშინ ბიბლუსში შესვლის ფაქტს აკრიტიკებს და მიიჩნევს, რომ აღნიშნულ საკითხზე და სტუდენტური მოძრაობის ქმედებებზე ხმას არ იღებენ არც პოლიტიკური ძალა და არც სამართალდამცავები რეაგირებენ ადეკვატურად:

"ის რაც გუშინ ამ ახალგაზრდებმა გააკეთეს ბიბლუსის ერთერთ ფილიალში არის ჩვეულებრივი მავნებლობა. ასეთი მავნებლობების რეაგირების გარეშე დატოვება სამართალდამცავების მხრიდან ახალისებს მსგავს ქმედებებს".

ჯაფარიძის თქმით, შსს-ს მხრიდან უყურადღებობა ამ საკითხზე, ქვეყნის მომავალს აზიანებს.

გირჩის ლიდერი მიიჩნევს, რომ ბიბლუსი არის კერძო კომპანია და არავის საქმე არაა, როგორია:

"ბიბლუსი არის ისეთი როგორიც არის. ის ქმნის/ყიდის რაღაც პროდუქტს. არავის საქმე არ არის როგორ პროდუქტს ქმნის. შეიძლება მოსწონდეს ვინმეს ეს პროდუქტი, შეიძლება არ მოსწონდეს, შეიძლება საერთოდ არ აინტერესებდეს".

ჯაფარიძე მიიჩნევს, რომ ბიბლუსის მუშაობის სისტემაში მთავარი არის ნებაყოფლობითი ჩართულობა და არა-ძალადობა:

"ასეთ სისტემაზე დგას თანამედროვე ცივილიზაცია. ყველა მცდელობა ამ სისტემის დემონტაჟისა და მის ნაცვლად "უკეთესი" სისტემის შექმნისა, რომელიც უგულვებელჰყოფს კერძო საკუთრების და ნებაყოფლობითი თანამშრომლობის პრინციპს, ბუნებრივად გულისხმობს ძალადობის ელემენტების გაჩენას. ამ ახალგაზრდებს ეს არ ესმით. არც უნდათ რომ გაიაზრონ. მაგრამ უნდა ესმოდეს ეს საქართველოს შინაგან საქმეთა სამინისტროს".

გირჩი შსს-ს მოუწოდებს დაიცვას ადამიანების საკუთრება და მათი ნებაყოფლობითი ხელშეკრულებები:

"თქვენი საქმე არაა გადაწყვეტილებების მიღება პოლიტიკური მიზანშეწონილობიდან გამომდინარე".

გუშინ ბიბლუსის უკვე ყოფილმა თანამშრომელმა, გიორგი კაპანაძემ, On.ge-სთან განაცხადა, რომ სამსახურიდან ვიდეო მიმართვის გამო გაათავისუფლეს, რომელშიც ბიბლუს გალერიში დასაქმებულები "უსამართლო" შრომით პირობებზე საუბრობდნენ.

გათავისუფლებული თანამშრომლების მხარდასაჭერად ბიბლუსის ფილიალში აუდიტორია 115-ის წევრები მივიდნენ.