ტელეკომპანია GDS-ს საინფორმაციო გამოშვების და საზოგადოებრივ-პოლიტიკური პროგრამების ეთერში განთავსება აღარ შეუძლია. დღეიდან ის სპეციალიზებული მაუწყებელია და მხოლოდ გასართობ-შემეცნებითი პროგრამების განთავსების უფლება აქვს.

საქართველოს კომუნიკაციების ეროვნულ კომისიას ავტორიზაციის ფორმის მოდიფიცირების მოთხოვნით GDS-მა რამდენიმე დღის წინ მიმართა, კომისიამ კი, მოთხოვნა დღეს, რამდენიმე წუთის წინ დააკმაყოფილა.

ამ დრომდე ტელეკომპანია GDS საერთო მაუწყებელი იყო, რაც მას საინფორმაციო გამოშვების და საზოგადოებრივ-პოლიტიკური პროგრამების განთავსებას ავალდებულებდა. თუმცა, მის ეთერში საზოგადოებრივ-პოლიტიკური პროგრამები 2017 წელს აღარ გასულა.

GDS მიმდინარე წლის 27 იანვარს ტელეკომპანია იმედის მფლობელმა კომპანიამ შპს კორჯიან პროდაქშენ გრუპმა იყიდა. არხი მანამდე საქართველოს ყოფილი პრემიერ-მინისტრის, მილიარდერის, ბიძინა ივანიშვილის შვილს, ბერა ივანიშვილს ეკუთვნოდა.

ტელეკომპანია იმედმა 2016 წლის 27 დეკემბერს მფლობელის - ჰოლდინგი იმედის განცხადება გაავრცელა. განცხადების მიხედვით, ჰოლდინგმა მაესტროს საკონტროლო პაკეტი შეიძინა და 2017 წლიდან მაესტრო იმედის ნაწილი ხდებოდა. თუმცა, საჯარო რეესტრში მაესტროს წილების ცვლილების შესახებ ინფორმაცია ამ დრომდე ასახული არაა.