ცნობილმა ამერიკელმა მსახიობმა შერონ სტოუნმა ავტობიოგრაფიული წიგნი The Beauty of Living Twice (ორჯერ ცხოვრების მშვენიერება) გამოსცა, სადაც თავისი კარიერისა და პირადი ცხოვრების მნიშვნელოვან მოგონებებთან ერთად, ახალგაზრდა ლეონარდო დიკაპრიოს გაცნობას და მასთან მუშაობას იხსენებს.

შერონ სტოუნი და ლეონარდო დიკაპრიო ერთად თამაშობენ ფილმში The Quick and the Dead (სწრაფი და მკვდარი), რომელიც კინოთეატრებში 1995 წელს გამოვიდა. ამ ფილმის გადაღებები 1993 წელს დაიწყო, როცა ლეონარდო დიკაპრიო დაახლოებით 19 წლის იყო და მას ჯერ არ ჰქონდა ოსკარის ნომინაცია მოპოვებული ფილმში What's Eating Gilbert Grape (რა აწუხებს გილბერტ გრეიპს) შესრულებული როლისთვის. მეტიც, მას ჯერ წინ ელოდა ფილმები რომეო და ჯულიეტა, კალათბურთელის დღიური და ტიტანიკი, რომლებმაც მას საყოველთაო აღიარება მოუტანა.

"ბავშვი, სახელად ლეონარდო დიკაპრიო, ერთადერთი იყო, ვინც კასტინგზე დავალებას გაართვა თავი. ჩემი აზრით, ის იყო ერთადერთი, ვინც როლში ზუსტად შევიდა და მამამისს, რომელიც იმ სცენაში იღუპებოდა, ცრემლებით ევედრებოდა სიყვარულს", — წერს სტოუნი.

შერონ სტოუნი, რომელიც ფილმის სწრაფი და მკვდარი მსახიობი და პროდიუსერიც იყო, იხსენებს, რომ გადამღები კინოსტუდიის მესვეურები იმავე აზრზე არ იყვნენ და დიკაპრიოს როლზე დამტკიცებას სულაც არ აპირებდნენ, თუმცა რადგანაც სტოუნი არ ნებდებოდა, შემდეგი რამ შესთავაზეს:

"[მითხრეს,] თუ მისი როლზე აყვანა ასე ძალიან გინდა, შენს ადგილზე მას ანაზღაურებას საკუთარი ჯიბიდან გადავუხდიდიო. და ასეც მოვიქეცი".

შერონ სტოუნი და ლეონარდო დიკაპრიო ფილმში სწრაფი და მკვდარი.

ფოტო: Sony Pictures Releasing

შერონ სტოუნი იხსენებს იმასაც, რომ კინოსტუდიას ამავე ფილმის რეჟისორად სემ რეიმის განხილვა არ სურდა, თუმცა მან ამ კინოხელოვანსაც დაუჭირა მხარი და საბოლოოდ, მართლაც მას ანდეს გადაღება.

"მსახიობისთვის პროდიუსერის სტატუსის მინიჭება ამ სფეროში "ფუჭი შეთანხმებაა", რაც იმას ნიშნავს, რომ ხელფასს გადაგიხდიან, მაგრამ საქმეში ზედმეტად არ უნდა ჩაერიო. მე კი მსგავს უსარგებლო სტატუსს არ მივიღებდი და მათ ეს დავუმტკიცე" — წერს ის თავის მემუარებში.