ევროპული საბჭოს პრეზიდენტის, შარლმ მიშელის პირადი წარმომადგენლის, კრისტიან დანიელსონის განცხადებით, ხელისუფლებასა და ოპოციას შორის გამართულ ბოლო მედიაციაზე იყო ელემენტები, რომლებზეც ერთგვარი შეთანხმება მოხერხდა. დანიელსონის თქმით, ეს შეეხებოდა საარჩევნო, მართლმსაჯულების რეფორმასა და პარლამენტში ძალაუფლების გადანაწილების საკითხს.

"სამწუხაროდ, მიწევს იმის თქმა, რომ არცერთმა პოლიტიკურმა პარტიამ დოკუმენტს ხელი არ მოაწერა. იყო ელემენტები, რომლებზეც იყო მიღწეული თანხმობა. ეს შეეხებოდა საარჩევნო, მართლმსაჯულების რეფორმასა და პარლამენტში ძალაუფლების გადანაწილების საკითხს. ეს პოზიტიურია და ამ მიმართულებით მუშაობა გაგრძელდება", — განაცხადა დანიელსონმა.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს