ხელოვნების მოყვარულებს მსოფლიოს ყველაზე პოპულარულმა ლუვრის მუზეუმმა განსაკუთრებული სიურპრიზი მოუმზადა: ამიერიდან ლუვრის მთლიანი კოლექციის დათვალიერება ონლაინ პლატფორმაზე სრულიად უფასოდაა შესაძლებელი.

ლუვრის კოლექცია 480 000-ზე მეტ ხელოვნების ნიმუშს ითვლის. კოლექცია მუზეუმის 8 განყოფილებას მოიცავს, რომელთა შორისაც აღმოაჩენთ ეგვიპტურ ხელოვნების ნიმუშებს, რენესანსის პერიოდის სკულპტურებს, მსოფლიოს ყველაზე გამორჩეული მხატვრების ნამუშევრებსა და სხვ. ონლაინ პლატფორმაზე სასურველი ხელოვნების ნიმუშის პოვნა თემატური ალბომების მიხედვითაცაა შესაძლებელი.

"ეს პირველი შემთხვევაა, როდესაც ნებისმიერ ადამიანს მთლიანი კოლექციის ხილვა კომპიუტერის ან სმარტფონის დახმარებით უფასოდ შეუძლია მიუხედავად იმისა, კონკრეტული ექსპონატი ამჟამად გამოფენილია, დროებით ხვაგანაა გაგზავნილი, თუნდაც დიდი ხნით, თუ საცავში ინახება", — აცხადებს მუზეუმის დირექტორი ჟან-ლუკ მარტინესი.

დამატებით, ლუვრის ინტერაქციული რუკა დაგეხმარებათ, მუზეუმის შენობა უკეთ გაიცნოთ და ექსპონატები სივრცეების მიხედვით დაათვალიეროთ. აღსანიშნავია ისიც, რომ ონლაინ პლატფორმა მუზეუმის კოლექციასთან ერთად გაფართოვდება.

კორონავირუსის პანდემიის ფონზე, მსოფლიოს მასშტაბით მუშაობა უამრავმა მუზეუმმა შეაჩერა. მათ შორისაა ლუვრიც, რომელიც მნახველებისთვის ოქტომბერში დაიხურა, რის გამოც მონა ლიზა, ვენერა მილოსელი და სხვა ცნობილი ექსპონატები დამთვალიერებლების გარეშე დარჩა.