მიუხედავად იმისა, რომ ბევრი ფანის აზრით, HBO-ში სამეფო კარის თამაშების ეკრანიზაცია ბოლომდე საკადრისად ვერ განახორციელეს, ჯორჯ მარტინი კომპანიასთან თანამშრომლობას მაინც განაგრძობს.

ჯორჯ რ.რ. მარტინმა თანამშრომლობის ხუთწლიან კონტრაქტს მოაწერა ხელი, რომლის ფარგლებშიც, ის უახლოეს მომავალში როგორც HBO-სთვის, ისე სტრიმინგ სერვის HBO Max-ის პროექტებზე იმუშავებს.

ამ ცნობილ ამერიკელ მწერალს ფენტეზის ჟანრის წიგნების სერიით ყინულისა და ცეცხლის სიმღერა იცნობენ, რომლის მიხედვითაც ყველა დროის ერთ-ერთი ყველაზე პოპულარული და გავლენიანი სერიალი სამეფო კარის თამაშები გადაიღეს.

ერთგულმა მაყურებლებმა კარგად იციან, რომ HBO ამ წარმატებული პროექტის კიდევ უფრო გაფართოებას განაგრძობს: უკვე იღებენ სამეფო კარის თამაშების პრიქველს House of the Dragon (დრაკონების სახლი), რომელიც ჩვენთვის ნაცნობ მოვლენებამდე ორასი წლით ადრინდელ ისტორიაზე მოგვითხრობს.

ასევე დადასტურდა ისიც, რომ დაპირებული სხვა რამდენიმე სერიალის გადაღებაც იგეგმება: სავარაუდო სახელწოდებებით 9 Voyages / Sea Snake, Flea Bottom და 10 000 Ships ვესტეროსის სხვადასხვა ეპოქის ისტორიას გავეცნობით.

მოკლედ, სერიალების მაყურებლებს წინ ნამდვილად საინტერესო არაერთი სანახაობა ელოდებათ, რასაც ასე თამამად ვერ ვიტყვით მარტინის შემოქმედების მკითხველებზე, რადგან მწერალი ყინულისა და ცეცხლის სიმღერის ახალი ნაწილის დაწერას კვლავ არ ჩქარობს.

ასევე იხილეთ: