ლეგენდარულ ინგლისელ მსახიობს, ჰელენ მირენს, მალე DC-ის კომიქსის ახალ კინოადაპტაციაში ვიხილავთ.

მირენი, რომელმაც 2006 წელს გამოსულ ფილმში დედოფალ ელისაბედ II-ის როლი მოირგო, ამჯერად, არც მეტი, არც ნაკლები, ღმერთი ატლასის ბოროტმოქმედ შვილად მოგვევლინება ფილმში Shazam! Fury of the Gods.

იმის გათვალისწინებით, რომ DC-ის კომიქსებში მირენის პერსონაჟს, ჰესპერას, გამოკვეთილი პროტოტიპი არ მოეძებნება, ჯერჯერობით ბევრი დეტალია უცნობი მის შესახებ. თუმცა, იგი, სავარაუდოდ, შაზამის ძალებითაა მოხიბლული; ეს ძალები კი მოიცავს მამამისის, ატლასისგან, ბოძებულ გამძლეობას, ჰერკულევსის ძალას, ზევსის ძლევამოსილებას, სოლომონის სიბრძნეს, აქილევსის სიმამაცესა და მერკურის სიჩქარეს.

ვარაუდობენ, რომ ფილმში ასევე გამოჩნდება რეიჩელ ზეგლერი.

ამას გარდა, კინოსურათში, რომლის პრემიერაც 2023 წლის ივნისისთვისაა დაგეგმილი, მის წინამორბედში მონაწილე თითქმის ყველა მთავარი როლის შემსრულებელი მსახიობი კვლავ გამოჩნდება.

Shazam!, რომელიც 2019 წელს გამოვიდა, კინოგაქირავებაში წარმატებული ნამუშევარი აღმოჩნდა და მსოფლიოს მასშტაბით $366 მილიონი გამოიმუშავა.

თუ მსგავსი სიახლეები გაინტერესებს და, ზოგადად, კინოხელოვნება შენი საყვარელი სადისკუსიო თემაა, შემოგვიერთდი ფილმების ჯგუფში.