იუსტიციის უმაღლესი საბჭოს არამოსამრთლე წევრის, ნაზი ჯანეზაშვილის თქმით, აშშ-ს სენატში გაკეთებული განცხადებები საქართველოს სასამართლოს ფუნდამენტური რეფორმის საჭიროებას მიუთითებს.

"განცხადებები, რომელებიც გაკეთდა აშშ-ს სენატში, სხვა პოლიტიკურ საკითხებთან ერთად, სასამართლოსთან მიმართებაშიც, პირდაპირ მიუთითებს იმაზე, რომ საქართველოს სასამართლოს სჭირდება ფუნდამენტური რეფორმა და განახლება", — აცხადებს ნაზი ჯანეზაშვილი.

მან გამოყო სამი საკითხი, რომლებიც, მისივე შეფასებით, აუცილებელია სასამართლო სისტემის განახლებისთვის.

"ვერ წარმომიდგენია სასამართლოს განვითარების პერსპექტივა იმ შემთხვევაში, თუ ამ სასამართლოში ლიდერებად დარჩებიან მურუსიძე, ჩინჩალაძე და სხვა ისეთი პირები, რომლებმაც მოგვიტანეს სწორედ ის მძიმე შედეგები, რაც დღეს სასამართლოშია. ამიტომ, მნიშვნელოვანია სასამართლო სისტემა გათავისუფლდეს კლანური მმართველობისაგან და განახლდეს.

მეორე, არანაკლებ მნიშვნელოვანი გახლავთ სასამართლო სისტემის ნეპოტიზმისგან გათავისუფლება როგორც აპარატის დონეზე, ასევე მოსამართლეების დონეზე.

მესამე, არანაკლებ ასევე მნიშვნელოვანი, არის საქმეთა განაწილების წესის შეცვლა და სისტემური ანალიზი, ვინაიდან, ყველაზე მთავარი, მოსამართლის დამოუკიდებლობისთვის არის ის, თუ როგორ ნაწილდება საქმეები", — განაცხადა ნაზი ჯანეზაშვილმა.

იუსტიციის უმაღლესი საბჭოს არამოსამრთლე წევრის თქმით, აუცილებელია გადაიხედოს სასამართლო პროცესების მიმდინარეობა და გაირკვეს, რატომ ჭიანურდება საქმეები.

23 მარტს სენატის საგარეო კომიტეტის სხდომაზე საქართველოში დემოკრატიის მდგომარეობის შესახებ მოსმენა გაიმართა. სენატორებმა საქართველოში არსებული პოლიტიკური კრიზისი შეაფასეს. საუბარი შეეხო ქართულ მართლმსაჯულებასაც. მაგალითად, სახელმწიფო დეპარტამენტის წარმომადგენელმა, კარა მაგდონალდმა განაცხადა რომ "დიდწილად მას კლანად მოიხსენიებენ".

გაიგეთ მეტი: