საქართველოს შინაგან საქმეთა სამინისტრო სასამართლოს ტელეკომპანია რუსთავი 2-ის დირექტორის, ნიკა გვარამიას მოწმის დაკითხვის შუამდგომლობით მიმართავს. ამის შესახებ განცხადება შსს-მ გაავრცელა.

„ვინაიდან ნიკა გვარამიამ საჯაროდ განცხადა, რომ შინაგან საქმეთა სამინისტროში მისვლას არ აპირებს და სასამართლოში დაკითხვას მოითხოვს, გამოძიება შუამდგომლობით მიმართავს სასამართლოს, რათა იგი მოსამართლის წინაშე მოწმის სახით იქნას დაკითხული," - განმარტებულია შსს-ს განცხადებაში.

დღეს გამართულ პრესკონფერენციაზე ნიკა გვარამიამ განაცხადა, რომ შსს-ში გამოკითხვაზე არ გამოცხადდებოდა. მისი თქმით, ის არ ენდობა შსს-ს, ითხოვს ჩანაწერებისთვის დამოუკიდებელ ექსპერტიზას და სასამართლოს საშუალებით დაკითხვას.