ქართული ოცნების დეპუტატის, ვიქტორ სანიკიძის განცხადებით, საქართველოში ყველას აქვს უფლება პარტიის ჩამოყალიბების, პოლიტიკაში დარჩენისა თუ წასვლის. ამის შესახებ მან On.ge-ს განუცხადა.

"მოკლედ გეტყვით, ჩვენს სახელმწიფოში ყველას აქვს უფლება პარტიის ჩამოყალიბებისაც, პოლიტიკაში დარჩენისაც და პოლიტიკაში წასვლისაც, ეს იქნება ჩემი კომენტარი", — განაცხადა მან.

ჩვენს კითხვაზე, განიხილავს თუ არა ის თავს გიორგი გახარიას გვერდით მისი შესაძლო დაბრუნების შემთხვევაში, ის აცხადებს, რომ "ამ ეტაპზე არაფერს არ განიხილავს".

პრემიერობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".