საგარეო საქმეთა მინისტრის, დავით ზალკალიანის თქმით, საქართველოს საერთაშორისო პარტნიორებს უკვირთ ქვეყანაში მიმდინარე პროცესები და ოპოზიციის დამოკიდებულებები.

"გაკვირვებული არიან ჩვენი პარტნიორები, როდესაც საუბრობენ [საქართველოს] შიდაპოლიტიკურ პროცესებზე. მათ უკვირთ ჩვენი ოპონენტების ასეთი დამოკიდებულება. ხომ არ შეიძლება ასე მუდმივად ვიყოთ ჩართული, ყოველ წელს, არჩევნებში, სანამ მათთვის სასურველი შედეგი არ დადგება?

სასაცილოა, მიუღებელია, არაცივილიზებულია, არადემოკრატიულია, არ არის ასეთი რამე არცერთ იმ ქვეყანაში დამკვიდრებული პრაქტიკა, რომელიც ნატოს წევრობისთვის იბრძვის", — განაცხადა დავით ზალკალიანმა იმედის ეთერში.

2020 წლის 31 ოქტომბერს ჩატარებულ საპარლამენტო არჩევნებს ოპოზიცია არალეგიტიმურს უწოდებს და ბოიკოტს უცხადებს საპარლამენტო საქმიანობას. ისინი თითქმის ხუთი თვეა ხელახალი არჩევნების ჩატარებას ითხოვენ. ამ და სხვა საკითხებზე მოლაპარაკებები ოპოზიციასა და მმართველ პარტიას შორის თვეებია მიმდინარეობს.

თავდაპირველად მოლაპარაკებების პროცესის ფასილიტატორები აშშ-სა და ევროავშირის ელჩები იყვნენ. ევროპული საბჭოს პრეზიდენტის, შარლ მიშელის საქართველოში ჩამოსვლის შემდეგ პროცესი ფასილიტაციიდან მედიაციაში გადავიდა. მიშელმა შეიმუშავა 6-პუნქტიანი მოლაპარაკების გეგმა და ქვეყნიდან გამგზავრების შემდეგ საქართველოში მისი პირადი წარმომადგენელი, კრისტიან დანიელსონი გამოაგზავნა.

ერთკვირიანი ინტენსიური მოლაპარაკებების შემდეგ, დანიელსონი ბრისუელში ისე დაბრუნდა, რომ ქართულ ოცნებასა და ოპოზიციას შორის შეთანხმება ვერ მოხერხდა.

გაიგეთ მეტი: