ქალი, რომელზე ძალადობის ბრალდებითაც პარტია თავისუფალი საქართველოს ყოფილი თანათავმჯდომარე, გოგი წულაია დააკავეს, ამბობს, რომ ყოფილმა დეპუტატმა მასზე სექსუალურად ძალადობა სცადა, წინააღმდეგობის გაწევის დროს კი დაზიანებები მიიღო.

ასმათ დვალიშვილის თქმით, წულაიასთან აქამდე დიდი ხნის ნაცნობობა, მეგობრობა აკავშირებდა და მის მიმართ გარკვეული სახის ნდობაც ჰქონდა. ქალი ამბობს, რომ ყოფილმა დეპუტატმა თბილისში, ერთ-ერთ შეხვედრაზე მედიატორად მიიწვია, რომელსაც თავადაც უნდა დასწრებოდა.

"გზაში, თბილისისკენ რომ მივდიოდით, მითხრა, გადაიდო შეხვედრა და ხვალ არისო. კომენდანტის საათიც ახლოვდებოდა და ბინის საკითხის მოგვარებაზე დავიწყე ფიქრი. ვუთხარი, რომ ნათესავებთან წავიდოდი. რატომ უნდა წახვიდე ნათესავებთან, მაქვს მოგვარებული ეგ საკითხიო.

სამნი ვიყავით თავიდან, მაგრამ სამივე ბინაში ვერ მოვხვდით და დავრჩით მე და ბატონი გოგი. თავიდან ჩვეულებრივად, გარკვეულ საკითხებზე ვისაუბრეთ, თემები განვიხილეთ და მოულოდნელად ძალადობა დაიწყო. თავიდან ვეცადე, რომ როგორმე მშვიდად მომეგვარებინა, მაგრამ მერე იძულებული გავხდი გამოვქცეულიყავი და შველა მეთხოვა. პოლიცია გამოვიძახე, სხვა გამოსავალი არ მქონდა. ნასვამი იყო, ბევრი დალია. სავარაუდოდ, მარიხუანაც ჰქონდა მოწეული", — გვიყვება ასმათი.

ასმათ დვალიშვილი ამბობს, რომ უკან დახევას არ აპირებს და შემთხვევისთვის სამართლებრივი შეფასების მისაცემად საკითხს ბოლომდე მიიყვანს.

"მე ახლა რომ უკან დავიხიო, გამოდის, რომ მოძალადეს უარესის გაკეთებაში ვუწყობ ხელს. ჯოჯოხეთს გავდივარ ახლა. ღმერთმა ყველა დაიფაროს ამისგან. ამიტომ არაფრით არ ვაპატიებ. ჩემ უკან სხვა ქალებიც დგანან, გოგოს მშობელიც ვარ მეც და ამიტომ ბოლომდე გავყვები ამ ამბავს. არავის ვუსურვებ ძალადობის მსხვერპლი გახდეს და ის ჯოჯოხეთის გაიაროს, რასაც მე ამ წამს გავდივარ.

ძალიან შეურაცხმყოფელია ყველაფერი. ყველაზე ცუდი ის არის, რომ გიწევს ისეთი პროცედურების გავლა, რაც შეურაცხმყოფელია იმ მხრივ, რომ გერიდება და უხერხულობას განიცდი, ამიტომაა ყველას რომ ეზიზღება ეს პროცედურები და შესაბამისად, თვალს ხუჭავენ ძალადობაზე", — ამბობს ის.

გოგი წულაიას ბრალი საქართველოს სისხლის სამართლის კოდექსის 126-ე მუხლით აქვს წარდგენილი, რაც ძალადობას გულისხმობს.

გოგი წულაია მე-6 მოწვევის პარლამენტის წევრი იყო. 2019 წელს ის ზესტაფონის მერობის კანდიდატად იყრიდა კენჭს. მარტის დასაწყისში მან პარტია თავისუფალი საქართველო დატოვა.