რამდენიმე წუთში დაიწყება ერთობლივი შეხვედრა ევროკავშირის წარმომადგენელთან, კრისტიან დანიელსონთან, რომელში მონაწილეობას მიიღებს როგორც მმართველი პარტია, ისე ოპოზიცია.

ეს არის პირველი ერთობლივი შეხვედრა მხარეებს შორის მას შემდეგ, რაც ევროპული საბჭოს პრეზიდენტის, შარლ მიშელის პირადი წარმომადგენელი, კრისტიან დანიელსონი მოლაპარაკების მედიაციისთვის საქართველოში ჩამოვიდა.

ამ წუთებში პარტიების ლიდერები ევროკავშირის წარმომადგენლობის ოფისში იკრიბებიან. პარტია გირჩი — მეტი თავისუფლების ლიდერს, ზურაბ ჯაფარიძეს უჭირს თქმა, რა ფორმატში წარიმართება შეხვედრა, თუმცა ვარაუდობს, რომ შესაძლოა, მომლაპარაკებლებმა შეძლეს მხარეთა პოზიციების დაახლოება.

"თავისთავად ის ფაქტი, რომ მომლაპარაკებლებმა გადაწყვიტეს ერთად დავსხდეთ მოლაპარაკების მაგიდასთან ოპოზიცია და ქართული ოცნება, შეიძლება გულისხმობდეს იმას, რომ მათ შეძლეს პოზიციების დაახლოება. ეს შეიძლება იყოს ოპტიმიზმის საფუძველი. ოღონდ, კიდევ ერთხელ გეუბნებით — შეიძლება. ეს არ არის ნამდვილად ასე, მაგრამ, შეიძლება ეს ამის ნიშანი იყოს [...]

არცერთ მხარეს არ აქვს სრული ინფორმაცია, აქვს მხოლოდ და მხოლოდ მომლაპარაკებლებს. მე გამიჭირდება კომენტარის გაკეთება იმაზე, როგორი შეხვედრა იქნება და რა ფორმატი იქნება. ვიცი, რომ იქნებიან "ოცნების" წარმომადგენლებიც. ერთადერთი რაც ვიცი, არის ეგ", — განაცხადა ზურაბ ჯაფარიძემ ოფისში შესვლამდე.

კრისტიან დანიელსონი უკვე მეექვსე დღეა მართავს შეხვედრებს როგორც მმართველი პარტიის, ისე ოპოზიციის ლიდერებთან. იგი, ასევე, შეხვდა პრეზიდენტს და არასამთავრობო ორგანიზაციების წარმომადგენლებს.

14 მარტი იყო დანიელსონის ვიზიტის ბოლო დღე საქართველოში, თუმცა, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

15 მარტს დანიელსონი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

თითქმის ორდღიანი შეჩერების შემდეგ, დანიელსონმა პარტიებთან შეხვედრები განაახლა და როგორც უკვე აღვნიშნეთ, დღეს იგი მმართველ პარტიასა და ოპოზიციას ერთად ხვდება.

გაიგეთ მეტი: