ქართული ოცნების დეპუტატი, დავით სერგეენკო მოქალაქეებს მოუწოდებს, რომ ვაქცინაზე მსჯელობისას მხოლოდ დარგის პროფესიონალებს მოუსმინონ. მისი განცხადებით, საქართველომ ვაქცინების მხრივ "ხარისხის მაღალი თამასა" დააწესა. ამის შესახებ მან პარლამენტის პლენარულ სხდომაზე ისაუბრა.

"ვაქცინების სახეობა, პირველი ჩემი თხოვნა, უმორჩილესი თხოვნა და მოწოდება იქნებოდა, რომ ამ ინფორმაციაზე მოვუსმინოთ მხოლოდ პროფესიონალებს, მხოლოდ დარგის პროფესიონალებს. კიდევ ერთხელ ვამბობ, რომ არ არსებობს დღეს ინდუსტრია, რომელიც ასეთი დეტალური კონტროლის ქვეშ არის, ისევე როგორც, მისი ეფექტურობა, მისი გვერდითი მოვლენები. მსოფლიოში დღეს რამდენიმე ვაქცინა გამოიყენება და საქართველომ თავისი მოქალაქეებისთვის დააწესა ხარისხის მაღალი თამასა", — თქვა მან.

15 მარტს საქართველოში კორონავირუსის წინააღმდეგ ვაქცინაცია დაიწყო. დაავადებათა კონტროლის ცენტრის ხელმძღვანელის მოადგილე, პაატა იმნაძე ერთ-ერთი პირველი იყო, ვინც ვაქცინა საჯაროდ გაიკეთა. მის გარდა, აიცრნენ ინფექციური საავადმყოფოს ექიმები, მათ შორის, მარინა ეზუგბაია და მარინა ენდელაძე.

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: