პარტია მოქალაქეების ლიდერი, ალეკო ელისაშვილი პარლამენტის ტრიბუნიდან ნიკოლოზ ბასილაშვილს მხარდაჭერას უცხადებს და ამბობს, რომ არ სჯერა "მისი მოძალადეობის". "არც უჩანს, რომ მოძალადეა", ამტკიცებს ელისაშვილი.

"ყველაზე მაღალი პოლიტიკური ტრიბუნა ეს ტრიბუნაა და აქედანაც მსურს მადლობა ვუთხრა უკვე ლეგენდარულ სპორტსმენს ნიკოლოზ ბასილაშვილს. შეიძლება დიდ ქვეყნებში არც არაფერი, ბევრი წარმატება აქვთ იქაურ სპორტსმენებს, ჩვენნაირი პატარა ქვეყნისთვის ეს სპორტიც არის, ხელოვნებაც არის და რავიცი, კულტურაც არის ერთბაშად.

როგორც კონსტანტინე გამსახურდია იტყოდა, წარმატებული კაცი რომ გამოგვერევა, მერე მზად ვართ დავკორტნოთ ყველამ, განსაკუთრებული ჟინით და ამ ახალგაზრდა კაცსაც ასე უტევდა ბევრი. ვერაფრით ვერ დავიჯერებ ამ კაცის მოძალადეობას, არც უჩანს, რომ მოძალადეა და პირიქით, ვნახეთ კიდეც, რომ მისი ცხოვრების ყველაზე მნიშვნელოვან წამებში სიტყვა წარმოთქვა და პირველ რიგში ვისაც მიმართა, არის მისი შვილი და ყველანი ამით, ალბათ გულაჩუყებულნი ვიყავით", — თქვა მან.

ნიკოლოზ ბასილაშვილს არასრულწლოვანი შვილის თანდასწრებით ყოფილ ცოლზე ძალადობაში ედება ბრალი. მას თბილისის საქალაქო სასამართლომ 100 ათასი ლარის ოდენობის გირაო შეუფარდა. ამასთან, შემაკავებელი ორდერია გამოცემული როგორც ჩოგბურთელის, ისე მისი მშობლების მიმართ.

პროკურატურის ინფორმაციით, ბასილაშვილმა ყოფილ ცოლს ფიზიკური შეურაცხყოფა 2020 წლის 21 მაისს მიაყენა, მეორე დღეს კი ის დააკავეს. საქმის შესწავლა დაიწყო სახალხო დამცველმაც.

როგორც დაზარალებული ქალი, ნეკა დოროყაშვილი ყვება, სპორტსმენმა მას ფიზიკური დაზიანებები მიაყენა, ხოლო ყოფილი მამამთილი დიდტარიანი საგნით გაეკიდა. მისივე თქმით, დაპირისპირება მაშინ მოხდა, როცა ის შვილის წამოსაყვანად ბასილაშვილის სახლში მივიდა. როგორც ის ამბობს, დაპირისპირების მიზეზი ამ დრომდე არ იცის. დოროყაშვილის განმარტებით, ქონებრივი დავა არ ჰქონიათ, რადგან ეს პროცესი მანამდე დასრულდა მოლაპარაკებით.

სპორტსმენი და მისი ოჯახი ბრალდებებს უარყოფენ. ჩოგბურთელმა განაცხადა, რომ სასამართლოს დასრულებამდე არ აპირებს საჯარო დისკუსიაში შესვლასა და საქმის დეტალებზე საუბარს.

13 მარტს ნიკოლოზ ბასილაშვილმა დოჰას 250-იანი ტურნირის ფინალი მოიგო. მანამდე, 11 მარტს ლეგენდარული ჩოგბურთელი, როჯერ ფედერერი დაამარცხა. დოჰას ტურნირში გამარჯვების შემდეგ, მან შვილს მიმართა და თქვა, რომ ის მისთვის ყველაზე ძვირფასი ადამიანია.