საპარლამენტო უმრავლესობის ერთ-ერთი ლიდერი, შალვა პაპუაშვილი აცხადებს, რომ ევროპული საბჭოს პრეზიდენტმა, შარლ მიშელმა საკუთარი რეპუტაცია დააყენა სასწორზე იმით, რომ ქართულ ოცნებასა და ოპოზიციას შორის მოლაპარაკებებში წარმატების მიღწევა ითავა.

"ჩართული არის [მოლაპარაკებებში] უმაღლესი დონე ევროკავშირის, რომელმაც საკუთარი რეპუტაციაც კი, გარკვეულწილად, დააყენა სასწორზე, პრეზიდენტ მიშელს ვგულისხმობ, ვინაიდან მან თავად ითავა, ასე ვთქვათ, აქ წარმატების მიღწევა. რა თქმა უნდა, მისი სურვილიც არის, რომ ეს იყოს", — განაცხადა შალვა პაპუაშვილმა POSTV-ის ეთერში.

ევროპული საბჭოს პრეზიდენტი, შარლ მიშელი საქართველოში 28 მარტს ჩამოვიდა. 1-ელ მარტს, მან ოპოზიციონერ ლიდერებთან და ქვეყნის პრემიერმინისტრთან, ირაკლი ღარიბაშვილთან ერთობლივი შეხვედრა გამართა. შეხვედრაზე იმსჯელეს ქვეყანაში პოლიტიკური პროცესების გაჯანსაღების 6-პუნქტიან გეგმაზე.

ქვეყნის დატოვების შემდეგ, მიშელმა გადაწყვიტა საქართველოში პირადი წარმომადგენელი გამოეგზავნა, რომელიც მმართველ პარტიასა და ოპოზიციას შორის მედიაციის პროცესში ჩაერთვებოდა. ევროპული საბჭოს განცხადებაში ვკითხულობთ, რომ შუამავლის საქართველოში მივლინება ევროკავშირის უმაღლეს წარმომადგენელთან, ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

კრისტიან დანიელსონი საქართველოში 12 მარტს ჩამოვიდა. იგი უკვე შეხვდა პრეზიდენტს, პრემიერმინისტრს, ქართული ოცნებისა და ოპოზიციის, ასევე, არასამთავრობო ორგანიზაციების წარმომადგენლებს.

გაიგეთ მეტი: