სამართლიანი არჩევნების (ISFED) დირექტორის, ნინო დოლიძის განცხადებით ევროპული საბჭოს პრეზიდენტის, შარლ მიშელის წარმომადგენელ კრისტიან დანიელსონთან შეხვედრაზე უპირველეს ყოვლისა საარჩევნო ადმინისტრაციაზე გაამახვილებენ ყურადღებას.

"დღეს ჩვენ ბატონ კრისტიანს ვესაუბრებით იმ პოლიტიკურ კრიზისზე, რაც სახეზეა და ჩვენ შევთავაზებთ ჩვენს ხედვებს იმ 6 პუნქტთან დაკავშირებით, რომელიც ბატონმა შარლმ მიშელმა მისი საქართველოში ვიზიტის დროს დაასახელა. ეს არის ის რეფორმები, რომელმაც საქართველო ძირეულად ახალ ეტაპზე უნდა გადაიყვანოს და ქვეყნის დემოკრატიულ განვითარებას ხელი უნდა შეუწყოს", — განაცხადა დოლიძემ.

ევროპული საბჭოს პრეზიდენტის წარმომადგენელი, კრისტიან დანიელსონი თბილისს 12 მარტს ეწვია და 14 მარტამდე დარჩება. პოლიტიკურ პარტიებთან დიალოგში მონაწილეობასთან ერთად, ის სამოქალაქო საზოგადოების წარმომადგენლებსაც შეხვდება.

კრისტიან დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: