თბილისის მერია აცხადებს, რომ ფეისბუკის მეშვეობით და მათი სახელით დაუზუსტებელი ინფორმაცია გავრცელდა.

"დღეს დილიდან, თბილისის მერიის სახელით, სოციალურ ქსელ ფეისბუქის საშუალებით ვრცელდება გარკვეული შინაარსის დაუზუსტებელი ინფორმაცია, რომელიც თბილისის მერიას არ ეკუთვნის.

ფეისბუქის გვერდი, რომელიც ერთ-ერთი სავაჭრო ობიექტის ანტირეკლამას ეწევა, არ წარმოადგენს თბილისის მერიის ოფიციალურ გვერდს" - აცხადებენ მერიაში.

გუშინ თბილისის მერიის სახელით არაოფიციალურმა გვერდმა გაავრცელა ინფორმაცია, რომლის მიხედვითაც კარფურის მაღაზიათა ქსელში ნაყიდ ხორცს მატლი ჰქონდა.

თბილისის მერია მოუწოდებს მოქალაქეებს, მეტი ყურადღება გამოიჩინონ ინფორმაციის წაკითხვისას და არ დაეყრდნონ ფეისბუქის ყალბი გვერდების მიერ გავრცელებულ ფაქტებს:

"მსგავსი სახის გადაუმოწმებელი ინფორმაციის გავრცელებამდე, მეტი დაკვირვების შემთხვევაში, ვფიქრობთ, შესაძლებელია ყალბი გვერდის უწყების ოფიციალური, ავტორიზირებული გვერდისგან გარჩევა" - აცხადებენ მერიაში.