ევროპული საქართველოს ერთ-ერთი ლიდერის, გიგი უგულავას განცხადებით, თუ დიალოგი რეალურად დაიწყება, ოპოზიცია საკუთარ სამოქმედო სტრატეგიაში კორექტივებს შეიტანს. მისი თქმით, ჯერ-ჯერობით, არანაირი ცვლილება არ არის. ამის შესახებ მან ოპოზიციის საერთო შეხვედრის დასრულების შემდეგ ისაუბრა.

"ჯერ-ჯერობით, ყველა აქცია ძალაშია. იმიტომ, რომ გარდა იძულებითი შეხვედრისა და ეს რომ იძულებითი შეხვედრა იყო ქართული ოცნებისთვის, დღეს ვნახეთ, ასევე, არის უსუსური მცდელობა საბაბად გამოიყენონ და წყალწაღებული ხავსს მოეჭიდონ, ან ერთი არგუმენტი მოიყვანოს ან მეორე. არანაირი კავშირი არა აქვს იმ ვალდებულებას, რაც მთავრობისა და ქართული ოცნების სახელით გუშინ აიღო ღარიბაშვილმა. შესაბამისად, არანაირი კავშირი არა აქვს იმასთან, იქნება აქცია თუ არ იქნება.

აქედან გამომდინარე, თუ რეალურად დაიწყება დიალოგი, ბუნებრივია, ჩვენ კორექტივებს შევიტანთ ჩვენს სამოქმედო სტრატეგიაში. მაგრამ, ჯერ-ჯერობით, როგორც გითხარით, არანაირი ცვლილება არ არის. იქნება მაქსიმალურად თავშეკავებული", — თქვა მან.

დღეს პარლამენტთან ოპოზიციის აქცია გაიმართა. 26 თებერვალს გამართულ აქციაზე ხატია დეკანოიძემ განაცხადა, რომ 2 მარტს პარლამენტის შენობის, ხოლო 5 მარტს მთავრობის ადმინისტრაციის შენობის პიკეტირება იგეგმება.

ოპოზიციის მიერ წარდგენილი გეგმის მიხედვით, 9 მარტს აქცია შინაგან საქმეთა სამინისტროსთან იგეგმება, 11 მარტს სასამართლოსთან, 13 მარტს კი პარლამენტთან.

ოპოზიციის საპროტესტო აქციები მას შემდეგ განახლდა, რაც ნაციონალური მოძრაობის ოფისში სპეცოპერაცია ჩაატარეს და ნიკა მელია დააკავეს. აღნიშნულ კრიტიკა და შეშფოთება მოჰყვა როგორც ქვეყნის შიგნით, ისე მის ფარგლებს გარეთ.