საქართველოს პრემიერმინისტრის, ირაკლი ღარიბაშვილის განცხადებით, იგი კონსულტაციებს გაივლის ქართული ოცნების პოლიტსაბჭოსთან და მათთან ერთად შემდგომ ნაბიჯებზე ჩამოყალიბდება. ამის შესახებ მან ოპოზიციასა და ევროპული საბჭოს პრეზიდენტთან შეხვედრის შემდეგ ისაუბრა.

"რა თქმა უნდა, მექნება კონსულტაციები პარტიის პოლიტიკურ საბჭოსთან, ჩვენ შემდგომ ნაბიჯებზე ჩამოვყალიბდებით და ამის შესახებ საზოგადოებას ვაცნობებთ ჩვენს პოზიციას. ასევე, მინდა გითხრათ, რომ ევროპული საბჭოს პრეზიდენტის მოწოდება იყო, რომ რაც შეიძლება მოკლე დროში, ჩვენ ყველამ ერთად, ოპოზიციამ, პოზიციამ, ხელისუფლებამ, გამოვნახოთ საერთო ენა, რომელიც საუკეთესოდ ემსახურება ჩვენი ქვეყნის და ხალხის ინტერესს", — თქვა მან.

ღარიბაშვილის თქმითვე, ისინი შეხვედრაზე შეთანხმდნენ, რომ დიალოგს გააგრძელებენ. აქამდე ღარიბაშვილი გამორიცხავდა ქვეყანაში პოლიტიკური კრიზისის არსებობას. იგი ამბობდა, რომ არავითარი კრიზისი არ არის, "გარდა პანდემიისა, ეკონომიკისა, სიღარიბის" და ა.შ. კრიზისებისა.

ჯერ კიდევ ერთი კვირის წინ აცხადებდა, რომ ოპოზიციისა და მმართველი გუნდის პოზიციები ერთმანეთთან ვერ დაახლოვდებოდა. "ღმერთმა დამიფაროს, რომ [ჩვენი პოზიციები] დაუახლოვდეს მათ პოზიციებს", — თქვა ღარიბაშვილმა. პრემიერმინისტრმა მართალია სივრცე დატოვა "კონსტრუქციულად განწყობილ" ოპოზიციასთან მოლაპარაკებებისთვის, თუმცა მოგვიანებით აღნიშნა, რომ "კატეგორიულად" აცხადებს უარს ნებისმიერ მოლაპარაკებაზე, რომელიც რიგგარეშე არჩევნებს უკავშირდება.