მრავალეროვანი საქართველო ხელისუფლებას მოუწოდებს, უზრუნველყოს სიტყვისა და გამოხატვის თავისუფლების დაცვა და გამოწვევებზე რეაგირების შემთხვევაში არ გასცდეს სამართლებრივ ჩარჩოებს.

ისინი, ასევე, მოუწოდებენ ყველა მხარეს თავი შეიკავონ პროცესების ძალადობრივი ფორმებით წარმართვისგან და დაუბრუნდნენ დიალოგის ფორმატს, რათა არ დაუშვან სიტუაციის შემდგომი ესკალაცია.

"აშკარაა, რომ მზარდი სოციალური, ეკონომიკური, გეოპოლიტიკური გამოწვევების გათვალისწინებით, რომლის წინაშეც დგას ქვეყანა, საზოგადოების პოლარიზაცია და მწვავე პოლიტიკური კრიზისი, სავალალო შედეგის მომტანია საქართველოს ევროპული და ევროატლანტიკური ინტეგრაციისაკენ მიმავალ გზაზე, რაც ქვეყნის პრინციპული არჩევანია. არსებული კონფრონტაციული გარემო, საფრთხეების შემცველია ქვეყნის დემოკრატიული განვითარებისათვის, ხოლო საერთაშორისო პარტნიორთა მიერ გამოთქმულმა შეშფოთებამ შესაძლოა რისკის ქვეშ დააყენოს ქვეყნის საერთაშორისო მხარდაჭერა", — აცხადებენ ისინი.

ქვეყანაში 2020 წლის ოქტომბრის საპარლამენტო არჩევნების შედეგების გამოცხადების შემდეგ შექმნილი პოლიტიკური კრიზისი ნაციონალური მოძრაობის თავმჯდომარის, ნიკა მელიას დაპატიმრებამ გაამწვავა.

მელიას დაკავებას საქართველოს მეგობარ ქვეყნებსა თუ პარტნორ ორგანიზაციებში კრიტიკული შეფასებები მოჰყვა. აშშ-ის პოზიცია საქართველოში ქვეყნის საელჩომ გამოხატა და თქვა, რომ ევროატლანტიკურ სახელმწიფოთა ოჯახში უფრო ძლიერი დემოკრატიისკენ მიმავალ გზაზე უკან დაიხია. შეშფოთება გამოთქვა ამერიკელმა კონგრესმენმა, საქართველოს მეგობართა ჯგუფის თანათავმჯდომარე ადამ კინზინგერმაც და მომხდარს დარბევა უწოდა. ევროკავშირის ელჩის, კარლ ჰარცელის განცხადებით კი, ქვეყანაში არსებულ ვითარებაზე პასუხისმგებლობა ყველა მხარემ უნდა აიღოს. მისი თქმით, საქართველოში პოლიტიკური კრიზისი ღრმავდება. ევროპარლამენტარ მარკეტა გრეგოროვას განცხადებით კი, ნაციონალური მოძრაობის თავმჯდომარე, ნიკა მელიას დაპატიმრება დემოკრატიის უკუსვლის აისბერგის მხოლოდ წვერია.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, დღეს 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.