საქართველოს მთავარი პროკურორის ყოფილი მოადგილე დავით საყვარელიძე აცხადებს, რომ ლაშა ნაცვლიშვილმა მის ერთ-ერთ მეგობარს მილიონების სანაცვლოს ბიძინა ივანიშვილის ფარული ჩანაწერების ყიდვა შესთავაზა და მოასმენინა კიდეც ერთ-ერთი ასეთი ჩანაწერი. ეს განცხადება საყვარელიძემ რუსთავი 2-ის გადაცემა არჩევანში გააკეთა:

"ჩემი ერთ-ერთი მეგობარი დაგიდასტურებთ, რომ კონკრეტულად ნარკომანი და მექრთამე ლაშა ნაცვლიშვილი 2013 წლის ბოლოს მას შეხვდა ევროპის ერთ-ერთ დედაქალაქში მას შემდეგ, რაც უკვე განაწყენებული და გაგდებული იყო ბიძინა ივანიშვილის ხელისუფლებასა და რეჟიმზე და რამდენიმე მილიონის სანაცვლოდ შემოგვთავაზა გვეყიდა ბიძინა ივანიშვილის სატელეფონო და ფარული ჩანაწერების ამსახველი აუდიო მასალა. რამდენადაც მახსოვს მოასმენინა კიდეც რამდენიმე, ასე ვთქვათ, ნიმუში. რამდენადაც მაშინ მილიონები არ გვქონდა და არც ახლა არ გვაქვს, რომ გვეყიდა ეს ჩანაწერები ამ ჩანაწერების რეალიზაცია ვერ მოხდა მაშინ."

ამავე გადაცემაში ნიკა გვარამიამ განაცხადა, რომ საყვარელიძე მასზე საუბრობდა:

"მე ვარ ის მეგობარი, რომელზეც დავით საყვარელიძე საუბრობდა." გვარამიას თქმით, მის ინტერესში ივანიშვილის ჩანაწერები შედიოდა, თუმცა მათ საყიდლად თანხა არ ჰქონდა. მისივე თქმით, ნაცვლიშვილს ამ დრომდე შენახული აქვს ფარული ჩანაწერები ერევანში.