ნაციონალური მოძრაობის ერთ-ერთი ლიდერის, ზაალ უდუმაშვილის განცხადებით, ცეკოს თავმჯდომარის, თამარ ჟვანის თანამდებობიდან შესაძლო გადადგომა სურათს ვერ შეცვლის. უდუმაშვილის თქმით, ჟვანის პოსტიდან წასვლა მათ მთავარ მოთხოვნაზე გავლენას ვერ მოახდენს, რაც ხელახალი არჩვენების დანიშვნაა.

"თამარ ჟვანიას აუცილებლად მოუწევს წასვლა. ხელისუფლება, სავარაუდოდ, ახლა ეძებს განტევების ვაცებს, იმისათვის, რომ ამ პოლიტიკური კრიზისიდან რაღაცნაირად გამოძვრეს. თუმცა ჟვანია ვერ იქნება განტევების ვაცი, ის არის ჩვეულებრივი დამნაშავე, რომელმაც 31 ოქტომბრის არჩევნები გააყალბა. ის არის მთავარი შემსრულებელი ბიძინა ივანიშვილის დაკვეთის.

შესაბამისად, თამარ ჟვანია ახლა კი არა, პირველ ნოემბერს უნდა გადამდგარიყო საკუთარი განცხადებით. ახლა მისი გადადგომა-არგადადგომა რეალურ სურათს ვერ შეცვლის. მის გადადგომასთან ერთად, თუ არ შეიცვალა მთლიანად საარჩევნო სისტემა, ახალი თამარ ჟვანია ეყოლება გამზადებული ქართულ ოცნებას, რომ დანიშნოს იქ. ეს მოქმედებები ვერაფრით ვერ იქონიებს გავლენას ჩვენს მთავარ მოთხოვნებზე, რომელიც არის ხელახალი არჩევნები", — განაცხადა უდუმაშვილმა.

ფორმულამ წყაროზე დაყრდნობით დღეს გაავრცელა ინფორმაცია, რომ ჟვანია თანამდებობიდან გადადგა. აღნიშნულს ცესკოში, ჯერჯერობით, არ ადასტურებენ.

2020 წლის საპარლამენტო არჩევნების შედეგებზე უნდობლობის გამო, ოპოზიცია თამარ ჟვანიას თანამდებობიდან წასვლას თვეებია მოითხოვს.