მკაცრი გამომეტყველება, გრძელი შავი ნაწნავები და მუქი ფერის ტანსაცმელი - უენსდი ადამსი ყველასათვის საყვარელი და ცოტათი უცნაური ადამსების ოჯახის ერთ-ერთი წევრია. ჩარლზ ადამსის მიერ შექმნილი პერსონაჟები ეკრანზე აქამდე არაერთხელ გაცოცხლებულან, თუმცა ახლა ცნობილი რეჟისორის, ტიმ ბარტონის ჯერი დადგა.

ნეტფლიქსის ახალი სერიალი უშუალოდ უენსდი ადამსის შესახებ მოგვითხრობს. სერიალში უენსდი ახლადაღმოჩენილი ზებუნებრივი ძალის გაკონტროლებას, ურჩხულის დამარცხებასა და იმ საიდუმლოების ამოხსნას ცდილობს, რომელიც მის მშობლებს 25 წლის წინ გადახდათ თავს. ამ ყველაფერს მან Nevermore-ის აკადემიაში სწავლა და სხვებთან ურთიერთობაც უნდა შეუთავსოს.

Edward Scissorhands, Batman, Batman Returns, Corpse Bride, The Nightmare Before Christmas - ტიმ ბარტონს საზოგადოება, უმეტესად, მისი ფილმებითა და ანიმაციებით იცნობს. რაც შეეხება სატელევიზიო სერიალებს, ბარტონი Alfred Hitchcock Presents-ის რამდენიმე სერიისა და Beetlejuice-ის ანიმაციური სერიალის შექმნაში მონაწილეობდა.

ნეტფლიქსისა და ტიმ ბარტონის ახალი პროექტი 8 ეპიზოდისგან შედგება.