ერთიანი ნაციონალური მოძრაობის ოფისში პოლიცია მივიდა. ამ დროისთვის, ადგილზე რამდენიმე პოლიციელია, თუმცა სამართალდამცავები მობილიზებულები არიან მიმდებარე ტერიტორიაზე. მათი განცხადებით, სასამართლოს მიერ გაცემულია განჩინება და ადგილზე სწორედ იმიტომ არიან, რომ "შესაბამისი ზომები გაატარონ".

"დაემორჩილეთ კანონიერ მოთხოვნას. ასევე, განგიმარტავთ რომ სასამართლო გადაწყვეტილებისათვის ხელის შეშლა ისჯება კანონით და გაფრთხილებთ, რომ წინააღმდეგობის გაწევის შემთხვევაში, მიღებული იქნება კანონით გათვალისწინებული ზომები. გაცემულია სასამართლოს განჩინება, ჩვენ უნდა შევიდეთ და განჩინებით გათვალისწინებული ზომები მივიღოთ", — განაცხადა ადგილზე მისულმა პოლიციელმა.

ისინი პარტიის ოფისში შესვლას ცდილობდნენ, თუმცა აქტივისტებმა ამის საშუალება არ მისცეს.

ენმ-ს ოფისში კი, ნიკა მელია ოპოზიციური პარტიების ლიდერებთან და მხარდამჭერებთან ერთად იმყოფება. ოპოზიციის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.