უამრავი ჩვენგანისთვის ბრიტნი სპირსის შემოქმედება თინეიჯერობის წლებთან ასოცირდება. 2000-იანი წლების პოპვარსკვლავი საზოგადოების ყურადღების ცენტრში ბევრჯერ აღმოჩენილა, თუმცა უკანასკნელ შემთხვევაში ამის მიზეზი მომღერლის ცხოვრების შესახებ გადაღებული დოკუმენტური ფილმი Framing Britney Spears გახდა.

New York Times-ის ფილმის პრემიერა 5 თებერვალს შედგა. მისი ნახვა Hulu-სა და FX-ზეა შესაძლებელი. ფილმი ბრიტნი სპირსის ბავშვობაზე, მეურვეობის საკითხსა და მოძრაობა #FreeBritney-ზეც მოგვითხრობს. ათწლეულზე მეტია, ბრიტნი სპირსს დამოუკიდებლად გადაწყვეტილების მიღების უფლება შეზღუდული აქვს. მის ფინანსურ და პირად საკითხებს მეურვე განაგებს. ბრიტნი სპირსის ცხოვრებას დღემდე მისი მამა, ჯეიმი სპირსი აკონტროლებს.

მოძრაობა #თავისუფლებაბრიტნის მხარდამჭერების საპროტესტო აქცია ლოს-ანჯელესის სასამართლოსთან. 2020 წლის 16 სექტემბერი.

ფოტო: Frazer Harrison / Getty Images

Page Six-ს ბრიტნი სპირსთან დაახლოებულმა პირმა განუცხადა, რომ ბრიტნიმ დოკუმენტური ფილმი უკვე ნახა და იმედი აქვს, რომ მალე მამამისისგან გათავისუფლდება. ბრიტნი, აგრეთვე, განსაკუთრებით მადლიერია იმ ცნობილი ადამიანების, რომლებმაც მას მხარი ღიად დაუჭირეს. ასეთ ადამიანებს შორისაა მსახიობი სარა ჯესიკა პარკერიც.

"ფილმის ზოგიერთი ნაწილი მისთვის ზედმეტად მძიმე და ემოციური აღმოჩნდა, განსაკუთრებით ის სცენები, რომელიც მისი ცხოვრების რთულ პერიოდებს, უმოწყალო მედიასა და ბრიტნის, როგორც ახალგაზრდა დედის უხეშად გაშუქებას უკავშირდება. მიუხედავად ამისა, წლების განმავლობაში პირველად გრძნობს, რომ ადამიანები მხარს უჭერენ და ყველაფერი გამოსწორდება", — ამბობს მომღერალთან დაახლოებული პირი.

ბრიტნის მეგობარი, აგრეთვე, აცხადებს, რომ პოპვარსკვლავს სცენაზე დაბრუნება და მუსიკის შექმნა უნდა, მაგრამ მამა ამის საშუალებას არ აძლევს. ჯეიმი სპირსი აქტიურად ერევა ბრიტნის პირად ცხოვრებაში. ბრიტნის შეყვარებულმა ინსტაგრამზე განაცხადა, რომ ჯეიმი სპირსი მათი ურთიერთობის გაკონტროლებას ცდილობს.

Page Six-ის ინფორმაციით, ბრიტნი საკუთარი ცხოვრების შესახებ დოკუმენტურ ფილმზე ცნობილ ქალ რეჟისორთან ერთად მუშაობს.

ამავე თემაზე: