პოლიტიკოსი ელენე ხოშტარია პარლამენტთან იმყოფება და აპირებს, ქართული ოცნების თავმჯდომარეს, ირაკლი კობახიძეს "გავრილოვის მადლობის წერილი" გადასცეს.

რუსეთის დუმის კომუნისტი დეპუტატმა, სერგეი გავრილოვმა ფუშინ ქართული ოცნება შეაქო და განაცხადა, რომ საქართველოში მმართველი პარტია აკეთებს ყველაფერს, რათა ქვეყანაში სახელმწიფო გადატრიალებები, ამბოხებები, რეპრესიები და დიქტატურა აღარ იყოს. გავრილოვთან იტერვიუ TV პირველმა ჩაწერა. მისივე მტკიცებით, ოპოზიცია საქართველოს იმიჯის შელახვას ცდილობს.

რუსი კომუნისტი დეპუტატი, რომელის საქართველოში ჩამოსვლასაც სამოქალაქო პროტესტი მოჰყვა ამტკიცებს, რომ ოკუპანტი ქვეყანა მზად არის მხარი დაუჭიროს ქართველი ხალხის თავისუფალ არჩევანს, დამოუკიდებლობასა და სუვერენიტეტს. ის ოკუპანტ ქვეყანას სტუმართმოყვარედ და მეგობრულად წარმოადგენს.

2019 წლის 20 ივნისს სამოქალაქო პროტესტი საქართველოში გავრილოვის ჩამოსვლას და მის მიერ პარლამენტის თავმჯდომარის სკამის დაკავებას მოჰყვა. მთავარი მოთხოვნა პარლამენტის თავმჯდომარის, ირაკლი კობახიძის გადადგომა იყო, რომელიც აწერდა ხელს ასამბლეის დღის წესრიგს. მას შემდეგ, რაც აქციის მონაწილეების მცირე ნაწილმა გააჟღერა მოთხოვნები პარლამენტში შესვლასთან დაკავშირებით, მათსა და პოლიციას შორის დაპირისპირება მოხდა. მოქალაქეების დიდი ნაწილი ამ პროცესში ჩართული არ ყოფილა. ხელისუფლებამ სპეცრაზმი გამოიყვანა, ისე, რომ ამის შესახებ ტერიტორიაზე შეკრებილი ადამიანები არ გააფრთხილა. გამოიყენეს რეზინის ტყვიები და ცრემლსადენი გაზი. შედეგად, რამდენიმე მოქალაქემ თვალი, ზოგმა კი მხედველობა დაკარგა.

20 ივნისის შემდეგ გავრილოვმა რუსული პროპაგანდის გავრცელება არაერთხელ სცადა. ის იღებდა და ქართულ ჯგუფებში აქვეყნებდა ვიდეოებს, სადაც ამტკიცებდა, რომ ოკუპანტი სახელმწიფო მეგობრულია. პროპაგანდის გავრცელებაში რუსული მედიაც აქტიურად იყო ჩართული. ის 20 ივნისს განვითარებულ მოვლენებს თავდასხმას უწოდებდა და თავის დროზე ქართული ოცნების ხელისუფლებისგან ბოდიშს მოითხოვდა.

დღეს პარლამენტის პლენარულ სხდომაზე ნიკა მელიას მანდატის შეწყვეტაზე იმსჯელებენ.

12 თებერვალს მელიას დაკავებისთვის გენერალურმა პროკურატურამ პარლამენტს მიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს.

გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნი საკითხი კი პარლამენტის პლენარულ სხდომაზე უნდა გადაწყდეს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.