14 წლის გარდაცვლილი გოგოს ბიძა TV პირველთან ამბობს, რომ სექსუალური ძალადობის მსხვერპლი ბავშვი შესძულდა. ის ადასტურებს, რომ პოლიციამ დაკითხა, მაგრამ მასზე ძალადობას უარყოფს.

"შემძულდა ეგ ბავშვი. დარიგება არ აკლდა. აგერ ახლა ძმა წასულია ღორს აჭმევს. გვერდით ვედექით მაგ ოჯახს. ბაბუა ამდენს როგორ შეძლებდა. არა, არ შევხებივარ, ბავშვი არ მინახავს.

ვუთხარი ეგ ყველაფერი პოლიციას, რაც გითხარით თქვენ. [პოლიციაში მკითხეს] თუ შეეხე ხელითო, არა-მეთქი. გავიგე ქალებიდან, მე იქ არ ჩავსულვარ, შემძულდა-მეთქი ეს ბავშვი" — ამბობს გარდაცვლილი გოგონას ბაბუის ძმისშვილი.

"გასვენების მეორე დღეს ჩავედი, ხალხი გკითხულობსო, ასე მითხრეს. არც მაგ ბავშვის გასვენებაში მინდოდა ჩასვლა. არ გააკეთა მან კარგი საქმე, ისეთი სიბილწე ჩაიდინა", — თქვა ბიძამ, ტარიელ ცეცხლაძემ რუსთავი 2-თან.

ქობულეთში გარდაცვლილი 14 წლის ბავშვის დედა ჟურნალისტებთან საუბრისას ნათესავების მხრიდან ფიზიკურ და ფსიქოლოგიურ ძალადობაზე მიუთითებდა და ამბობდა, რომ მას შემდეგ, რაც სექსუალური ძალადობის შესახებ ბავშის ბიძებმა გაიგეს, მასზე ფიზიკურად იძალადეს.

"ფიზიკურად შეეხნენ, როცა ჩემი შვილი გააუპატიურეს. იმ დღეს, სანამ პოლიციაში წამოიყვანდნენ, ჩემი შვილი უმოწყალოდ სცემეს, ჩემი მამამთილის ძმისშვილებმა. ყველაფერი ბავშვმა მომიყვა. ამის შემდეგ წაიყვანეს [პოლიციაში]", — ამბობდა გარდაცვლილი ბავშვის დედა.

15 თებერვალს 14 წლის ნინის გარდაცვალების საქმეზე გამოძიებამ ბაბუა მოსამართლის განჩინების საფუძველზე დააკავა. შინაგან საქმეთა სამინისტროს ცნობით, მას ბრალად წინასწარი შეცნობით ოჯახის არასრულწლოვანი წევრის მიმართ ჩადენილი მუქარა და ძალადობა ედება. დანაშაული 3 წლამდე ვადით თავისუფლების აღკვეთას ითვალისწინებს.

11 თებერვალს შინაგან საქმეთა სამინისტრომ გაავრცელა ინფორმაცია, რომ ქობულეთში 24 წლის კაცი დააკავეს, რომელმაც 16 წლამდე ბავშვთან სქესობრივი კავშირი დაამყარა. პოლიციამ კაცი მას შემდეგ დააკავა, რაც ბავშვმა თავი მოიკლა. როცა მედიაში ბავშვის თვითმკვლელობის შესახებ ინფორმაცია გავრცელდა, შსს სავარაუდო სექსუალურ ძალადობას არ ადასტურებდა. იმ განცხადებაში კი, სადაც მოძალადის დაკავებაზეა საუბარი, ასევე არაფერი იყო თვითმკვლელობაზე.

დაკავებულს ბრალი ორი მუხლით აქვს წარდგენილი: სრულწლოვანის სექსუალური ხასიათის შეღწევა დამნაშავისთვის წინასწარი შეცნობით თექვსმეტი წლის ასაკს მიუღწეველის სხეულში (ორი ეპიზოდი) და თვითმკვლელობამდე მიყვანა. ეს მუხლები, ბრალის დამტკიცების შემთხვევაში, სასჯელის სახედ და ზომად 7-დან 9 წლამდე თავისუფლების აღკვეთას ითვალისწინებს.

მომხდარზე განცხადება სახალხო დამცველმაც გააკეთა. ობმუდსმენის თქმით, სახალხო დამცველის აპარატი ქობულეთში გარდაცვლილი 14 წლის ბავშვის საქმეზე თითოეული სახელმწიფო უწყების პასუხისმგებლობის საკითხს, შესაძლო დაგვიანებული და არაეფექტური რეაგირების მიმართულებით შეისწავლის.