შინაგან საქმეთა სამინისტროს წარმომადგენლები გირჩი — მეტი თავისუფლებას ლიდერის, ზურაბ ჯაფარიძის ბარში მივიდნენ.

"ლაივიც გამათიშინეს და მითხრეს, რომ ლაივი აკრძალული იყო, რადგან საგამოძიებო მოქმედებებს ვუშლიდი ხელს. გარეთ გამომიშვეს, ახლა უკან აღარ მიშვებენ, ახლა მპასუხობენ, რომ არ აინტერესებთ ვინ ვარ, უბრალოდ საგამოძიებო მოქმედებებში ვუშლი ხელს. ახლა შიგნით რა ხდება არ ვიცი, დიდი ალბათობით, ოქმს ადგენენ და დიდი ალბათობით, დალუქავენ", — აცხადებს გირჩის ერთ-ერთი წარმომადგენელი, რომელიც ადგილზე იმყოფება.

ჯაფარიძის ბარში შრომის ინსპექცია რამდენიმე საათის წინ მივიდა. მათ განაცხადეს, რომ დაფიქსირდა "არანებადართული ეკონომიკური საქმიანობის" განმეორება, რისი ამსახველი მასალებიც შსს-ს გაეგზავნება.

ზურაბ ჯაფარიძის თქმით, მას შრომის ინსპექციამ ჰკითხა, ეწეოდა თუ არა ეკონომიკურ საქმიანობას, რაზეც ის დაეთანხმა.

"მკითხეს, ისევ ვეწევი თუ არა ეკონომიკურ საქმიანობას, მე ვუთხარი, რომ კი, ბარია ჩემი. მითხრეს, რომ ეს არის აკრძალული და შესაბამისად მასალებს გადაუგზავნიან შინაგან საქმეთა სამინისტროს. ამაზე დავიშალეთ მე და ის ქალბატონი, მეტი არაფერი არ ყოფილა", — განაცხადა ჯაფარიძემ.

მანვე განაცხადა, რომ თუ ბარს დალუქავენ, ის ლუქს გახსნის.

"ჯერ მათ უნდა მიიყვანონ ეს ბოლომდე, უნდა გადაუგზავნონ ეს საქმე პარლამენტს, მათ უნდა შემიჩერონ უფლებამოსილება. ჯერ მათი სვლები არის დარჩენილი კიდევ, მერე გეტყვით მე რას ვაპირებ", — განაცხადა გირჩის ლიდერმა.

ზურაბ ჯაფარიძემ ჯარიმის მიუხედავად დღეს ბარი მაინც გახსნა.

გაიგე მეტი: