ქუთაისში 73 წლის კაცი დააყაჩაღეს. მისი შვილი მთავარ არხთან ამბობს, რომ კაცი უთოს გამოყენებით აწამეს.

"დაბმული ყოფილა სკამზე, კისერში თოკი ჰქონდა, ხელებიც თოკით ჰქონდა და ძირს იყო წაქცეული. არის უთო, რომელიც მე არ მქონდა იქ. გამომძიებელი მეუბნება, ამ უთოთი არის დაუთოებულიო. აქვს დამწვრობა 27%. აბსოლუტურად ყველაფერი დალეწილია სახლში, მამას ჰქონდა გაფორმებული სანადირო თოფი, ისიც წაღებული აქვთ", — ამბობს შვილი.

პენსიონერი გადაყვანილია დამწვრობის ცენტრში, სადაც On.ge-ს უთხრეს, რომ კაცს აქვს კონტაქტური, ზედაპირული და ღრმა დამწვრობები.

"მესამე ან მესამე ბ ხარისხის დამწვრობები აქვს მუცლის წინა კედელზე, ორივე ბარძაყზე, ორივე დუნდულოზე, მარცხენა ზედა კიდურზე. საერთო ფართობით დაახლოებით 23%. ღრმა არის, 8%. პაციენტის მდგომარეობა ამ წუთას არის მძიმე, თუმცა სტაბილური", — ამბობს ქირურგი, დამწვრობის ცენტრის სამედიცინო დირექტორი, გიორგი აბესაძე.

საქართველოს შინაგან საქმეთა სამინისტროს ინფორმაციით, გამოძიება სისხლის სამართლის კოდექსის 179-ე მუხლის მე-2 ნაწილის "ბ" და მე-3 ნაწილის "ბ" ქვეპუნქტებით მიმდინარეობს, რაც ბინაში უკანონო შეღწევით ჯგუფურ ყაჩაღობას გულისხმობს.