შემოსავლების სამსახურის ყოფილმა თანამშრომელმა მოქმედ თანამშრომელს სცემა და ფოტო, სადაც დაშავებულის სისხლიანი სახე ჩანს, Facebook-ზე გამოაქვეყნა.

"არ შემეძლო არ მეთქვა თქვენთვის, რომ გავფაქტე ვირთხა. ეს არის შესანიშნავი ეგზემპლარი ვირთხის და კურდღლის ნაჯვარი. დაინტერესებული პირები შემეხმიანეთ", — დაწერა მან ფეისბუქზე და საკუთარი მობილურის ნომერი მიუთითა.

ეს პოსტი, ასევე, ამ ადამიანის ფეისბუქ ანგარიში უკვე აღარ იძებნება.

On.ge-ს ინფორმაციით, შემთხვევა დღეს, დაახლოებით 13:00 საათზე მოხდა — სავარაუდო თავმდამსხმელი შემოსავლების სამსახურის ყოფილი თანამშრომელია, დაშავებული კი მოქმედი. დაზარალებული უკვე გადაყვანილია თბილისის ერთ-ერთ კლინიკაში, თუმცა მას მედიასთან საკუთარი ჯანმრთელობის მდგომარეობის შესახებ საუბარი არ სურს. ჩვენი ინფორმაციით, უკვე დააკავეს სავარაუდო თავდამსხმელიც.

შემოსავლების სამსახურში On.ge-ს უთხრეს, რომ მომხდარის დეტალებს აზუსტებენ და განცხადებას გაავრცელებენ. შინაგან საქმეთა სამინისტროს ინფორმაციით კი, გამოძიება საქართველოს სისხლის სამართლის კოდექსის 118-ე მუხლით დაიწყო, რაც ჯანმრთელობის განზრახ ნაკლებად მძიმე დაზიანებას გულისხმობს.