საზოგადოებრივი მაუწყებლის დირექტორის მრჩეველის, ია ანთაძის განცხადებით, მაღლაფერიძის წარდგენილ ცვლილებების გეგმაში გაწერილია ვადები, თანხები, მიზნები და შედეგები. მისივე თქმით, იმ შემთხვევაში, თუ სამეურვეო საბჭო მოძებნის გზას, რომ ზოგი გადაცემა არ დაიხუროს და ეს გზა არ დააზიანებს საზოგადოებრივი მაუწყებლის დირექტორის საბოლოო მიზნებს, მაღლაფერიძე დათანხმდება ასეთ შემოთავაზებას. ამის შესახებ ანთაძემ ტვ პირველის ეთერში ისაუბრა:

"თუ სამეურვეო საბჭო იპოვის გზას საზოგადოებასთან ერთად, ჩვენთან ერთად, როგორ შეიძლება ჩვენ გადაცემები გამოვარჩიოთ ერთმანეთისგან და ზოგიერთი გადაცემა დავტოვოთ და ზოგიერთი მოვხსნათ ისე, რომ ჩვენი მთლიანი მიზანი არ დაზარალდეს. ჩვენ, რასაკვირველია, ვიქნებით მხოლოდ მოხარული და ჩვენ წამოვალთ ასეთ შეთანხმებაზე. ოღონდ, სამეურვეო საბჭომ უნდა მოძებნოს ეს გზა. ჩვენ ეს გზა ვერ მოვძებნეთ და ამიტო ვთქვით, რომ მოდი იყოს სისტემური მიდგომა ამ საკითხის მიმართ და თუკი სამეურვეო საბჭო, საზოგადოებრივი დისკუსიის ჩარჩოში რამე სხვას შემოგვთავაზებს, მე გარწმუნებთ, რომ ჩვენ მხოლოდ ბედნიერები ვიქნებით."

საზოგადოებრივი მაუწყებლის ახალმა გენერალურმა დირექტორმა, ვასილ მაღლაფერიძემ მაუწყებლის სამწლიანი განვითარების გეგმა დღეს, 6 თებერვალს წარადგინა. გეგმა გულისხმობს:

  • მაუწყებლის ყველა პლატფორმაზე, საინფორმაციო გამოშვებების გარდა, ყველა გადაცემისა და ყველა წარმოების შეჩერებას;
  • თანამშრომელთა რაოდენობის ოპტიმიზაციას;
  • გამოთავისუფლებული თანხების მიმართვას მატერიალურ-ტექნიკური ბაზის გასაახლებლად;
  • მაუწყებლის ყველა სეგმენტში კონკურენციის პრინციპზე გადასვლას.