უსაფრთხოების პოლიტიკის ევროპული ღირებულებების ცენტრი უცხო ქვეყნების საქართველოზე გავლენის შესახებ ანგარიშს აქვეყნებს, სადაც მთავარ ბოროტ ძალად რუსეთია ნახსენები. ევროპული ღირებულებების ინსტიტუტის ანგარიშში, რომელიც საქართველოში მოქმედ სხვადასხვა არასამთავრობო ორგანიზაციას ეყრდნობა, ვკითხულობთ:

"ორი ათწლეულია საქართველოს მოსახლეობის აბსოლუტური უმრავლესობა ევროკავშირსა და NATO-ში გაწევრიანების უცვლელი მომხრეა, თუმცა აღსანიშნავია ისიც, რომ რუსეთის მიერ დაფინანსებული ორგანიზაციებისა და რადიკალური მოძრაობების რიცხვი საქართველოში იზრდება. რადიკალური ჯგუფების რაოდენობა და მიმდევრები არსებობა ისეთივე საგანგაშო არ არის, როგორც ის, რომ ხელისუფლება ამ ჯგუფების უსიტყვოდ უჭერს მხარს, თუ არ ახალისებს, აქვს პასიური დამოკიდებულება, რითაც, ასევე, აიხსნება მათი მომრავლება, რადგან ეს ჯგუფები მარგინალიზებულნი და სახელმწიფოს მხრიდან ადეკვატურად დასჯილნი არ არიან".

ანგარიშში, ასევე, ხაზგასმულია, რომ საქართველოს უსაფრთხოების სამსახურები კრემლის ინტერესებზე მომუშავე რუსული მავნე ძალების გამოვლენისა და ამ ჯგუფების დასახელებისგან თავს იკავებენ.

კვლევამ, აგრეთვე, დაადასტურა, რომ რუსული რბილი ძალის სტრატეგია მართლმადიდებლურ ქრისტიანობასთან დასავლური ღირებულებების შეუთავსებლობას უსვამს ხაზს, რასაც ქართველი სამღვდელოებაც ეხმიანება.

ანგარიშში ყურადღება გამახვილებულია საქართველოს ნეიტრალიტეტის ნარატივსა და ანტი-თურქულ რიტორიკაზე, რომელიც მნიშვნელოვნად ემყარება ისტორიულ შედარებებსა და ფართოდ გავრცელებულ ყალბი ინფორმაციებს, თითქოს, ანკარამ, სავარაუდოდ, აჭარის რეგიონი მოითხოვა და ოკუპირებულ ტერიტორიაზე ბაზები გახსნა.

ანგარიშში მოხვდა საქართველოში ამერიკის შეერთებული შტატების მიერ დაფუძნებული და დაფინანსებული ლუგარის ლაბორატორია, რომელიც რუსეთის დეზინფორმაციის მანქანისთვის შთაგონების წყაროდ იქცა.

დოკუმენტში აღნიშნულია, რომ ლუგარის ლაბორატორიაზე თავდასხმებს 2020 წელს ჩინეთის საგარეო საქმეთა სამინისტროც შეუერთდა, მიუხედავად იმისა, რომ ლაბორატორიამ ინსტიტუტი Covid-19-ის პანდემიის წინააღმდეგ ბრძოლაში თავისი მნიშვნელობა და საიმედოობა დაამტკიცა.

მიუხედავად იმისა, რომ საქართველოში პოპულარული შეხედულება მკაფიოდ პროევროპული და NATO-ში გაწევრიანების მომხრეა, მკვლევრები დასავლეთის მიმართ ლოიალობის შეცვლის პირველ ნიშნებსაც ხედავენ.

"მიუხედავად იმისა, რომ ჯერ განგაშის მიზეზი არ არის, მნიშვნელოვანია აქტიური მუშაობა, რათა დეზინფორმაციულ კამპანიებსა და ყალბ ნარატივებთან ბრძოლა შედეგიანი იყოს და შემდგომი მოქმედებების დღის წესრიგი განისაზღვროს", — წერია დოკუმენტში.

უსაფრთხოების პოლიტიკის ევროპული ღირებულებების ცენტრი სახელმწიფო ინსტიტუტებში, არასამთავრობო ორგანიზაციებში, მედიაში, პოლიტიკურ პარტიებსა და ეკლესიებში მესამე ქვეყნის გავლენებს აკვირდება.

ნაშრომი საქართველოში მოქმედი არასამთავრობო ორგანიზაციების ერთობლივი ძალისხმევით შეიქმნა, რომელშიც მონაწილეობდნენ:

• საქართველოს ატლანტიკური საბჭოს DFRLab;
• სამოქალაქო იდეა (Civic idea);
• საქართველოს რეფორმების ასოციაცია (GRASS);
• მედიის განვითარების ფონდი (MDF).

რაც შეეხება პუბლიკაციაში გამოყენებულ მეთოდოლოგიას, წარმოდგენილი მონაცემები და ფაქტები ემყარება:

• ღია წყაროების მასალებს, მათ შორის სამთავრობო დოკუმენტებსა და მაღალი დონის საჯარო განცხადებებს;
• ოფიციალური პირებს;
• არსებულ კვლევებსა და ანალიზებს (აკადემიური, კვლევითი ცენტრები, ჟურნალისტური კვლევები);
• აგრეთვე, მედიის ინფორმაციის წყაროებს;
• სიღრმისეული ინტერვიუები შესაბამის ექსპერტებთან და ოფიციალურ წარმომადგენლებთან, რომლებიც აკადემიურ, საზოგადოებრივ და სამოქალაქო პირებს წარმოადგენენ.

ანგარიშს სრულად შეგიძლიათ გაეცნოთ აქ.