Super Bowl ამერიკული ფეხბურთი სეზონის ბოლო თამაშია, რომელშიც ლიგის გამარჯვებულის ვინაობა ირკვევა. ეს მატჩი აშშ-ში ერთ-ერთი ყველაზე ყურებადი ტელეპროდუქტია, რომელსაც ათობით მილიონი ადამიანი უყურებს, მაგალითად 2015 წელს თამაშს 114.5 მილიონი ადამიანი უყურებდა. ამ თამაშის ტრანსლაციის დროს კომპანიები განსაკუთრებულ რეკლამებს იღებენ, რომელიც ბოლო ათწლეულებში ერთგვარ კულტურად ჩამოყალიბდა.

გამონაკლისი არც წელს ყოფილა და შესაბამისად, წარმოგიდგენთ იმ რეკლამებს, რომლებიც წლევანდელ Super Bowl-ზე ნახა მაყურებელმა - კონკრეტულად კი, ტექნოლოგიურ სფეროსთან დაკავშირებულ რგოლებს.

1. GoDaddy

დომეინების რეგისტრაციისა და ჰოსტინგის კომპანია.

რგოლის მთავარი პერსონაჟი ინტერნეტია, რომელსაც ყველაფერი მოსწონს, კატები, კრეატიულად გაკრეჭილი ბუჩქები, პანდები და ტროლებიც კი. და ამიტომ ითხოვს უფრო მეტი რამ შევთავაზოთ. "ინტერნეტს უყვარს ყველაფერი, რასაც აკეთებთ. შექმენით საიტი ერთ საათში GoDaddy-ზე."

2. Intel 360°

გამეორების ტექნოლოგია, რომელიც სპორტულ თამაშებში გამოიყენება.

ამ რგოლის მთავარი გმირი ამერიკული ფეხბურთის ვარსკვლავი ტომ ბრეიდია, რომლის ყოველდღიური რუტინა Intel 360°-ის ტექნოლოგიის საშუალებით ეპიკური ხდება.

3. Wix

ვებსაიტების შესაქმნელი სერვისი.

სანამ ჯეისონ სტეტჰემი და გალ გადოტი რესტორანს ანადგურებენ, თქვენ მშვიდად და წყნარად შეგიძლიათ საიტის აწყობა. ხოლო როცა რესტორნის აღდგენა შეუძლებელია, პატარა სტარტაპის ვებგვერდიც ასევე ადვილად იქმნება.

4. Airbnb

ბინების ქირაობის აპლიკაცია.

Airbnb-ის მომხმარებელი მთელს მსოფლიოში ჰყავს და შესაბამისად, მისი მესიჯი ყველა ადამიანს ეკუთვნის. კომპანიის ახალი რეკლამა ტრამპის პოლიტიკასა და ზოგადად არატოლერანტულობას ეხმაურება. "სამყარო უფრო ლამაზია, როცა ერთმანეთის მიმართ მიმღებლები ვართ."

5. Nintendo Switch

ვიდეო თამაშების კონსოლი.

აქ განსაკუთრებული არაფერია, ნინტენდომ გადაწყვიტა ახალი კონსოლი ძველი და ლეგენდარული თამაშით გააპიაროს.

6. Hyundai

ავტომობილების მწარმოებელი კომპანია.

Hyundai-მ სარეკლამო რგოლი პირდაპირ თამაშის მიმდინარეობისას ჩაწერა და მისი დამთავრებისთანავე გაუშვა ეთერში.

რგოლში ვხედავთ ამერიკელ ჯარისკაცებს, რომლებიც 360 გრადუსიანი კამერის საშუალებით სტადიონზე საყვარელი ადამიანების გვერდით აღმოჩნდნენ და მათთან ერთად უყურეს თამაშს.

7. T-Mobile

მობილური ოპერატორი

სნუპი, მარტა სტიუარტი და სიტყვების თამაში მარიხუანაზე.

8. Sprint

მობილური ოპერატორი

ვერაიზონის (კონკურენტი მობილური ოპერატორის) კლიენტი თავის სიკვდილს ათამაშებს, რათა არსებულ კონტრაქტს თავი დააღწიოს. ამ დროს მასთან Sprint-ის წარმომადგენელი მიდის და ეუბნება, რომ მათ ქსელზე გადართვის შემთხვევაში, ყველაფერი გაცილებით ადვილად მოგვარდებოდა.

9. Google Home

ვირტუალური ასისტენტი.

Google-ის ახალი მოწყობილობა თქვენს ხმოვან ბრძანებას მოისმენს და შეასრულებს, აანთებს შუქს, ჩართავს მუსიკას, გიკარნახებთ რეცეპტს ან ფრაზას სხვა ენაზე და გაგიადვილებთ ცხოვრებას.

10. Mobile Strike

ვიდეო თამაში სმარტფონებისთვის.

"I'm Back" - არნოლდ შვარცნეგერი დაბრუნდა და ის მთელ არმიას აკონტროლებს, მათ შორის სამხედრო ვერტმფრენებსა და გამანადგურებლებს. არნი ტერმინატორის საფირმო ფრაზით: "Hasta la vista, baby"-ით ემშვიდობება მტრულად განწყობილ ვერტმფრენებს.

11. Ford

ავტომობილების მწარმოებელი კომპანია.

"გამოუვალი სიტუაციები არავის უყვარს, ამიტომ ფორდი ქმნის ახალ საშუალებებს, რომლებიც ცხოვრებაში წინსვლისთვის დაგეხმარებათ." ველოსიპედების გაზიარების სერვისი, ელექტრო მანქანები, თვითმართული მანქანები და ა.შ. ფორდის ახალი პროდუქტებია.

12. Audi

ავტომობილების მწარმოებელი კომპანია.

აუდის წლევანდელი რეკლამა გენდერულ თანასწორობას ეხება. "რა ვუთხრა ჩემს ქალიშვილს? რომ ბაბუა უფრო ძვირფასია, ვიდრე ბებია? რომ მამა სჯობს დედას? და რომ მიუხედავად მისი განათლებისა და უნარებისა, ის ყველა კაცთან შედარებით მეორეხარისხოვანია? ან იქნებ სხვა რამე ვუთხრა?" - აუდი გვამცნობს, რომ მისი ყველა თანამშრომელი, განურჩევლად სქესისა, იღებს თანაბარ ანაზღაურებას.

13. Squarespace

დომეინების რეგისტრაციის სერვისი.

ჯონ მალკოვიჩს თავისი სახელობის დომეინი არ აქვს, რადგან ვიღაცამ დაასწრო და იყიდა. Squarespace მოგვიწოდებს მანამდე ვიყიდოთ ჩვენი სახელობითი დომეინები, ვიდრე ჩვენც იგივე სიტუაციაში აღმოვჩნდებით.

ასევე იხილეთ: