Super Bowl ამერიკული ფეხბურთი სეზონის ბოლო თამაშია, რომელშიც ლიგის გამარჯვებულის ვინაობა ირკვევა. ეს მატჩი აშშ-ში ერთ-ერთი ყველაზე ყურებადი ტელეპროდუქტია, რომელსაც ათობით მილიონი ადამიანი უყურებს, მაგალითად 2015 წელს თამაშს 114.5 მილიონი ადამიანი უყურებდა. ამ თამაშის ტრანსლაციის დროს კომპანიები განსაკუთრებულ რეკლამებს იღებენ, რომელიც ბოლო ათწლეულებში ერთგვარ კულტურად ჩამოყალიბდა.

გთავაზობთ წლევანდელ რეკლამებს, რომლებიც საავტომობილო ბრენდებმა წარმოადგინეს.

1. Honda

ტინა ფეი, ემი ადამსი, სტივ კარელი, ჯიმი კიმელი, ვაიოლა დევისი, სტენ ლი, მეჯიქ ჯონსონი, რობერტ რედფორდი და მისი ელიოტი თავიანთი სასკოლო ალბომების პორტრეტებიდან გველაპარაკებიან და მოგვიწოდებენ ჩვენს ოცნებებს ბოლომდე მივყვეთ. ამაში კი Honda CR-V დაგვეხმარება.

2. Alpha Romeo

"როცა პატარები ვიყავით, გვინდოდა ეპიკურები ვყოფილიყავით, შემოვასხდებოდით დრაკონებს ან მფრინავ მანქანებზე ვოცნებობდით. ჩვენ გვასწავლიდნენ, რომ ძალა ნიშნავს იყო ყველაზე ძლიერი ტიპი. მაგრამ კუნთები საკმარისი არ იყო, ჩვენ ვისწავლეთ საკუთარი თავის მართვა, ვისწავლეთ, რომ ჩვენი პიროვნებისადმი ერთგულება ყველაზე მთავარია, რომ ბალანსი კი არ მოიპოვება, არამედ იქმნება. და ჩვენი თავის ახლიდან შექმნა, ყველაზე ადამიანური თვისებაა. ეს ყველაფერი კი იმისთვის გვჭირდება, რომ უშიშრები ვიყოთ, რომ ისევ შემოვასხდეთ დრაკონებს და შევქმნათ მფრინავი მანქანები."

3. KIA

მელისა მაკარტის ხან ვეშაპების გადასარჩენად ეძახიან, ხან ხეების, ხანაც ყინულოვანი საფარის, მარტორქების და ხანაც რისი. ის ყოველთვის სასაცილო სიტუაციებში ვარდება და სასწაულებრივად გადარჩება. "ძნელია იყო გმირი, მაგრამ ადვილია გყავდეს გმირული მანქანა" - ეს კიას სლოგანია.

4. Alpha Romeo

"Mozzafiato - ნიშნავს სუნთქვის შეკვრას აღფრთოვანებით. როცა აღფრთოვანდები მისი გამოჩენით. მისი შენს გვერდით ყოფნით. მისი სიძლიერით. Mozzafiato - Gulia ალფა რომეოსგან. ზოგი მანქანა სუნთქვას შეგიკრავთ. მხოლოდ ერთი გაგიხსნით."

5. Ford

"გამოუვალი სიტუაციები არავის უყვარს, ამიტომ ფორდი ქმნის ახალ საშუალებებს, რომლებიც ცხოვრებაში წინსვლისთვის დაგეხმარებათ." ველოსიპედების გაზიარების სერვისი, ელექტრო მანქანები, თვითმართული მანქანები და ა.შ. ფორდის ახალი პროდუქტებია.

6. Mercedes-AMG GT Roadster

პიტერ ფონდა (Easy Rider) ძმები კოენების გადაღებულ სარეკლამო რგოლში.

7. Audi

აუდის წლევანდელი რეკლამა გენდერულ თანასწორობას ეხება. "რა ვუთხრა ჩემს ქალიშვილს? რომ ბაბუა უფრო ძვირფასია, ვიდრე ბებია? რომ მამა სჯობს დედას? და რომ მიუხედავად მისი განათლებისა და უნარებისა, ის ყველა კაცთან შედარებით მეორეხარისხოვანია? ან იქნებ სხვა რამე ვუთხრა?" - აუდი გვამცნობს, რომ მისი ყველა თანამშრომელი, განურჩევლად სქესისა, იღებს თანაბარ ანაზღაურებას.

8. Buick

არავის სჯერა, რომ Buick-ის ახალი მოდელები ასე გამოიყურება.

"ეს თუ Buick-ია, მაშინ ჩემი შვილი კემ ნიუტონია," - ამბობს პატარა ფეხბურთელის მამა, რის შემდეგაც მისი შვილი ამერიკული ფეხბურთის ვარსკვლავად გადაიქცევა და თამაშს მოიგებს.

"ეს თუ Buick-ია, მაშინ მე სუპერ მოდელი ვარ," - ამბობს მწვრთნელი და ის მაშინვე მირანდა კერიდ გარდაისახება.

9. Lexus

ძალიან ჩვეულებრივი საიმიჯო რგოლი.

10. HYUNDAI

Hyundai-მ სარეკლამო რგოლი პირდაპირ თამაშის მიმდინარეობისას ჩაწერა და მისი დამთავრებისთანავე გაუშვა ეთერში.

რგოლში ვხედავთ ამერიკელ ჯარისკაცებს, რომლებიც 360 გრადუსიანი კამერის საშუალებით სტადიონზე საყვარელი ადამიანების გვერდით აღმოჩნდნენ და მათთან ერთად უყურეს თამაშს.

ასევე ნახეთ: