უკრაინა ინდოეთში წარმოებული AstraZeneca-სა და Novavax-ის ვაქცინების 12 მილიონ დოზას მიიღებს. ამის შესახებ ინფორმაციას უკრაინის პრეზიდენტის, ვოლოდიმირ ზელენსკის განცხადებაზე დაყრდნობით Reuters ავრცელებს.

"12 მილიონი დოზა არის ძალიან კარგი სიგნალი ჩვენი პარტნიორების მხრიდან. ეს იქნება საკმარისი, რომ მოწოდებიდან პირველი თვეების განმავლობაში, ვაქცინაცია უზრუნველვყოთ", — განაცხადა უკრაინის პრეზიდენტმა.

მედიის ცნობით, უკრაინის ჯანდაცვის სფეროს წარმომადგენლებმა განაცხადეს, რომ ვაქცინაცია ქვეყანაში, სავარაუდოდ, თებერვლის შუა რიცხვებში დაიწყება. მათივე ინფორმაციით, უკრაინა ვაქცინების გარკვეულ დოზას ჩინეთისგანაც შეისყიდის და 8 მილიონამდე დოზას Covax პლატფორმის ფარგლებშიც მიიღებს.