პარტია მოქალაქეების ლიდერმა, ალეკო ელისაშვილმა ევროპული საქართველო "მეორე ნაციონალურ მოძრაობად" მოიხსენია. მან თქვა, რომ ქართული ოცნების მიერ დაანოსნებულ საგამოძიებო კომისიაში იმ შემთხვევაში მიიღებს მონაწილეობას, თუ მასში ჩაერთვებიან — პატრიოტთა ალიანსი, ნაციონალური მოძრაობა და "მეორე ნაციონალური მოძრაობა, ბოკერიას პარტია".

"ჩვენ ამ საგამოძიებო კომისიაში ჩავერთვებით მხოლოდ იმ შემთხვევაში, თუკი მასში მონაწილეობას მიიღებს ის სამი ოპოზიციური პარტია, რომელსაც მთელი საქართველოს მასშტაბით, 3 800-ვე საარჩევნო უბანში ჰყავდა კომისიის წევრები. ესენი არიან, პატრიოტთა ალიანსი, ნაციონალური მოძრაობა და მეორე ნაციონალური მოძრაობა — ბოკერიას პარტია. ამ ხალხს ჰყავდათ ცესკო მიერ დაფინანსებული კომისიის წევრები", — განაცხადა ელისაშვილმა.

გუშინ ქართულმა ოცნებამ საგამოძიებო კომისიის შექმნა კვლავ დააანონსა. როგორც მმართველი პარტიის დეპუტატმა, კახა კუჭავამ განაცხადა, თუკი დაფიქსირდება თუნდაც 1%-იანი გადახრა ქართული ოცნების სასარგებლოდ, ისინი მზად არიან რიგგარეშე არჩევნები დანიშნონ. თუმცა, მისი თქმით, პარტიაში "ღრმად" არიან დარწმუნებულნი, რომ "დაფიქსირებული შედეგებიდან გადახრა გამორიცხულია".