პრემიერმინისტრ გიორგი გახარიას განცხადებით, მთავრობის პროგრამა, რომელიც საბანკო სესხის პროცენტის 80%-ის სუბსიდირებას გულისხმობს, კერძო საბავშვო ბაღებსა და სპორტულ ობიექტებსაც შეეხება. ამის შესახებ მან მთავრობის სხდომაზე განაცხადა, სადაც რამდენიმე შეზღუდვის მოხსნის შესახებ გახდა ცნობილი.

"მათი მხრიდანაც იყო საკმაოდ სერიოზული მოთხოვნა და ეს ის ორგანიზაციებია, ეს ის ბიზნესებია, რომელიც, ასევე, პანდემიის შედეგად დაზარლდა", — თქვა მან.

ამასთან, გახარიამ აღნიშნა, რომ ამ პროგრამით სარგებლობის სურვილი 2 000-მა რესტორანმა გამოთქვა, თუმცა "ტექნიკური მიზეზების გამო" მოთხოვნები მხოლოდ 420-მა დააკმაყოფილა. მისი თქმით, დღეს მთავრობის სხდომაზე ამ ტექნიკური მოთხოვნის შემსუბუქების შესახებ მიიღებენ გადაწყვეტილებას, რათა იმ რესტორნებმა, რომლებმაც სუბსიდირებისთვის მთავრობას მიმართეს, ამ დახმარებით სარგებლობა შეძლონ.

მთავრობის სხდომის დასრულების შემდეგ, ეკონომიკის მინისტრმა, რესტორნებისთვის განაცხადების მიღებას 8 თებერვლიდან დაიწყებენ და 5 მარტამდე გაგრძელდება. გარდა ამისა, თურნავამ განმარტა, რომ დამატებით მიკროსაფინანსო სესხის მქონე რესტორნები და კვების ობიექტები შეძლებენ, მიიღონ მონაწილეობა სესხის სუბსიდირებაში.

ამასთან, თუ სუბსიდირება აქამდე 2020 წლის პირველ მარტამდე გაცემულ სესხებს ეხებოდა, ახლა ეს 2020 წლის პირველ დეკემბრამდე აღებულ სესხებზეც გავრცელდება. გადაიხედება თანაფარდობა ძირითადი საშუალებებისთვის აღებულ სესხსა და საბრუნავი საშუალებებისთვის აღებულ სესხს შორის.

"80/20-ზე იყო და ძირითადი საშუალებები იყო უპირატესი და ჩვენ ვიცით, რომ ეს თანაფარდობა ირღვევა და უფრო მეტად საბრუნავი საშუალებები უჭირს ბიზნეს, ამიტომ 50/50-ზე იქნება. გარკვეული კატეგორიებისთვის, განსაკუთრებით ბოლო დროს აღებული სესხებისთვის საერთოდ უქმდება", — განმარტა თურნავამ.

როგორც თურნავამ თქვა, ექვსი თვის განმავლობაში დარიცხული პროცენტი იმ სესხებისთვის, რომელიც 2020 პირველ დეკემბრამდეა აღებული, 80 პროცენტით იქნება სუბსიდირებული.

რაც შეეხება კერძო საბავშვო ბაღებსა და სპორტულ ობიექტებს, ეკონომიკის მინისტრი ამბობს, რომ სესხის სუბსიდირება შეეხება როგორც ბანკიდან, ისე მიკროსაფინანსო ორგანიზაციიდან აღებულ სესხსა და ლიზინგის პროცენტს.