საქართველოს მთავრობის ადმინისტრაციას კახაბერ ქემოკლიძე უხელმძღვანელებს. მთავრობის ადმინისტრაციის ახალი უფროსი პრემიერმინისტრმა, გიორგი გახარიამ მთავრობის დღევანდელ სხდომაზე წარადგინა. როგორც გახარიამ აღნიშნა, მას აქვს საკმარისი ცოდნა იმისთვის, რომ მთავრობის ადმინისტრაციის ეფექტურ მუშაობას გაუძღვეს.

"კახა ქემოკლიძე ჩვენს გუნდში უკვე წლებია, მუშაობს. ის არის ერთ-ერთი ღირსეული საჯარო მოხელე, რომელიც წლების განმავლობაში ემსახურება თავის ქვეყანას და გუნდს. მას აქვს დიდი გამოცდილება ქვეყნის მსახურებაში", — განაცხადა გახარიამ.

2012 წლის ივნისიდან — 2018 წლის აპრილამდე, კახაბერ ქემოკლიძე იყო შსს-ს, მოგვიანებით სუს-ის სპეციალური წარმომადგენელი ჟენევის საერთაშორისო დისკუსიებზე და ცენტრალური მთავრობის მხრიდან მთავარი მომლაპარაკებელი ინციდენტების პრევენციისა და მათზე რეაგირების მექანიზმის (IPRM) ჯგუფის შეხვედრებზე.

2016-2018 წლებში ის, ასევე, იყო ცენტრალური ხელისუფლების სპეციალური წარმომადგენელი ოკუპირებული ცხინვალის რეგიონის მიმართულებით უგზო-უკვლოდ დაკარგულ პირთა მოძიების სამმხრივი საკოორდინაციო მექანიზმის შეხვედრებზე.

ქემოკლიძე 2018 წლის აპრილიდან შსს-ს საინფორმაციო-ანალიტიკური დეპარტამენტს ხელმძღვანელობდა. 2019 წლის აგვისტოში კი, ეროვნული უსაფრთხოების საბჭოს აპარატის უფროსად დაინიშნა.