ქართული ოცნების დეპუტატის, გია ვოლსკის განცხადებით, კარტოგრაფების საქმეში ბრალდებულ ივერი მელაშვილს "განზრახ დაატარებენ" თავშეყრის ადგილებში, რომ "იქნებ ვინმემ მას შეურაცხყოფა მიაყენოს". ამის შესახებ მან პარლამენტში ჟურნალისტებთან საუბრისას განაცხადა.

"იქ ვამბობ, რომ ივერი მელაშვილს განზრახ დაატარებენ საზოგადოების თავშეყრის ადგილებში, ყოველ შემთხვევაში, ასეთი ეჭვი ჩნდება, იმისათვის, რათა იქნებ ვინმემ შეურაცხყოფა მიაყენოს და ამ პროვოკაციაზე არ უნდა აჰყვეს საზოგადოება", — თქვა მან.

ეს მეორე განცხადებაა, რაც დეპუტატმა ამ საკითხთან დაკავშირებით გააკეთა. ჟურნალისტებთან ასე განმარტა მან თავდაპირველი გამოხმაურება, რომელიც დღეს პარლამენტის სხდომაზე გააჟღერა. დეპუტატმა პირველი განცხადება იმიტომ განმარტა, რომ მისი თქმით, იგი "დაუმახინჯეს".

"გასაგებია საზოგადოების გაღიზიანება დავით გარეჯის თემასთან დაკავშირებით, დამოკიდებულება და ეს ემოციების შეჯახება ერთმანეთზე. თვალსაჩინოა, რომ ეს ადამიანები, მიწათმზომველები, თუ რომლებიც არ არიან სპეციალისტები და რომლებმაც გარკვეულ ოქმებზე მოაწერეს ხელი, უნდა საზოგადოებას წარუდგინო და ხშირ შემთხვევაში ერთი მათგანი ატარო თავშეყრის ადგილებზე, იქნებ ვინმემ შეურაცხყოფა მიაყენოს, იქნებ ვინმემ აგრესია გამოხატოს და იქნებ, თუკი სასამართლოს გადაწყვეტილება არ იქნა ისეთი, როგორსაც ისინი მოელიან, იქნებ მერე ეს საზოგადოების სასამართლოზე, თუ ხელისუფლების არა, სასამართლოზე ზეწოლას დააბრალო. ეს ტაქტიკა იმდენად ადვილად იგრძნობა და იშიფრება, რომ ამაზე საუბარიც კი აღარ იყო საჭირო", — განაცხადა მან პარლამენტის სხდომაზე.

გუშინ ივერი მელაშვილს სავაჭრო ცენტრში სიტყვიერი შეურაცხყოფა მიაყენეს. ამის შესახებ ვიდეო სოციალურ ქსელში ერთ-ერთმა მომხმარებელმა გაავრცელა. აღნიშნულს მელაშვილის ადვოკატი, გიორგი მშვენიერაძეც გამოეხმაურა და აღნიშნა, რომ ამ ყველაფერზე პასუხისმგებლობა ხელისუფლებას ეკისრება, რომელიც მშვენიერაძის განცხადებით, საკუთარი "პროპაგანდით მორალურ სასამართლოს უწყობს უდანაშაულო ადამიანებს და ხალხს უბიძგებს მათზე ძალადობრივი იერიშისკენ".