ქართული ოცნების დეპუტატი თეა წულუკიანი ფასილიტატორების, მმართველი გუნდისა და ოპოზიციის მოლაპარაკებებს "უპერსპექტივო რაუნდებს" უწოდებს. მისი თქმით, დღეს ოპოზიციისთვის მანდატის შეწყვეტა იქნებოდა ამ რაუნდისთვის კარის დახურვა, რაც არასწორია, მიუხედავად იმისა, რომ ამ მოლაპარაკებების აზრს ვერ ხედავს.

"ეს არ არის მარტივი გასაკეთებელი, მაგრამ ეს ის არის, რასაც იმსახურებს ეს ქვეყანა. ამ ეტაპზე თავი შევიკავოთ მათი უფლებამოსილების შეწყვეტისგან. რატომ? რა ფაქტორებია ეს? კიდევ ერთხელ რომ შევახსენოთ ჩვენს თავს და ამომრჩეველს, არის ის, რომ ჩემი გაგებით ის უპერსპექტივო რაუნდები, რაც ჯერ კიდევ მიმდინარეობს, ვინაიდან მიმდინარეობს, პოლიტიკურად არასწორი იქნება, რომ ამ რაუნდებს წინ ჩავუხტეთ და ასე ვთქვათ, რაუნდი დახურულად გამოვაცხადოთ.

იმიტომ, რომ რეალურად, თუკი ჩვენ გავიზიარებთ კომიტეტის აბსოლუტურად სამართლიან დასკვნას, გამოდის რომ რაუნდები აქ დავხურეთ, ეს არ იქნებოდა პოლიტიკურად სწორი. მიუხედავად იმისა, კიდევ ერთხელ ვამბობ, რომ ეს რაუნდები ალბათ არსად არ მიგვიყვანს, იმედია ვცდები. მგონი არ მიგვიყვანს, რომ ამ ადამიანების პარლამენტში შემოსვლა არ არის მიზანი. ამ ადამიანების მიზანი არ არის არჩევნები და არც არასდროს ყოფილა", — განაცხადა მან.

ფასილიტატორებთან მოლაპარაკება ერთადერთი ფორმატია, რომელშიც მმართველი გუნდი და ოპოზიცია ერთმანეთთან პოლიტიკურ კრიზისს განიხილავენ.