ქართული ოცნების აღმასრულებელი მდივანი, მამუკა მდინარაძე მაღაზიაში ივერი მელაშვილისთვის სიტყვიერი შეურაცხყოფის მიყენებას კიდევ ერთხელ ეხმაურება და პარალელს ბათუმში, უმაღლესი საბჭოს დეპუტატისთვის თავზე ნაგვის დაყრასთან ავლებს. კერძოდ, ის ამბობს, რომ ქართული ოცნების ოპონენტების აზრით, ნაგვის დაყრა გამოხატვის თავისუფლებაა და ივერი მელაშვილის შეურაცხყოფა "უმძიმესი თავდასხმა". აღსანიშნავია ისიც, რომ ოპოზიციის დიდმა ნაწილმა, მათ შორის, ნაციონალური მოძრაობის ორმა ლიდერმა, ნაგვის თავზე დაყრა გამოხატვის თავისუფლებად არ მიიჩნია.

"არაფერს ნიშნავდა თურმე და გამოხატვის თავისუფლება იყო ბათუმში მომხდარი ინციდენტი, სადაც ნაგავი ჩამოამხეს ადამიანს, დეპუტატს თავზე მხოლოდ იმის გამო, რომ მისი პოზიცია ნაცმოძრაობის პოზიციას არ დაემთხვა. ეს გამოხატვის თავისუფლება იყო და გუშინდელი ინციდენტი თურმე იყო უმძიმესი თავდასხმა. ეს არის ორმაგი სტანდარტი. იქაც შეიძლება ჩვენ გარკვეული კრიტიკა ჩავრთოთ, მაგრამ ხარისხი დამოკიდებულების, ხარისხი მიმართვის და იმ ადამიანს შეიძლება აბსოლუტურად გულწრფელად სჯეროდა და სწამდა იმის, რასაც ამბობდა... შეიძლება არ გავამართლოთ, მაგრამ გულწრფელად სწამდა და სჯეროდა იმისა, რასაც აკეთებდა და მეორე მხრივ, ჩვენ თავდასხმას არ ვუწოდებთ ნაგვის თავზე ჩამომხობას, პატივისა და ღირსების ამგვარ უმძიმეს შელახვას და ეს თურმე მოსულა ნაცებისა და მათი პროპაგანდისტების აზრით და ადამიანს რაღაც უთხრა, მისი აზრი, თუნდაც იმ ფორმით, ეს თურმე არ მოსულა. ორმაგი სტანდარტია, თორემ ამასაც გავაკრიტიკებდი", — აცხადებს მდინარაძე.

ჟურნალისტის კითხვას, ამგვარი განცხადებები შეიძლება გახდეს თუ არა წახალისება, მდინარაძე პასუხობს, რომ კარტოგრაფების საქმეზე ბრალდებულების ადვოკატების სტრატეგია "მოღალატეობრივია".

"დაცვის სტრატეგია, რომელიც გადის იმაზე, რომ მტკიცებულებებით, დოკუმენტურად დადასტურებული რაც არის, ისიც კი არ არის ჩვენი, ეს არის მოღალატეობრივი. ეს ჩემი აზრითაც. ეს არ არის წახალისება, ეს არის სიმართლე. თუ რომელიმე ადამიანს ასე მიაჩნია, ეს შეუძლია ეს თქვას, თუმცა ფორმა რაღაც მომენტში შეიძლება გადაზედმეტებულად მოგვეჩვენოს ჩვენ ყველას ერთად, მაგრამ როდესაც ასჯერ უარესზე თქვენ ამბობთ, რომ ეს გამოხატვის თავისუფლებაა და ამას თავდასხმას უწოდებთ, ეს არის ორმაგი სტანდარტი, რომელიც არის აბსოლუტურად მიუღებელი", — თქვა მდინარაძემ.

აღსანიშნავია, რომ მელაშვილი/ილიჩოვას დაცვის მხარეს ამგვარი სტრატეგია არ აქვს და ადვოკატებს ასეთი განცხადება არ გაუკეთებიათ.

გუშინ, პირველ თებერვალს, კარტოგრაფების საქმეში ბრალდებულ ივერი მელაშვილს სავაჭრო ცენტრში სიტყვიერი შეურაცხყოფა მიაყენეს. ამის შესახებ ვიდეო სოციალურ ქსელში ერთ-ერთმა მომხმარებელმა გაავრცელა.