ნაციონალური მოძრაობის წევრის, სალომე სამადაშვილის თქმით, პირველი შემთხვევაა, როდესაც უზენაესი სასამართლოს მოსამართლეები თავად საუბრობენ მათ წინააღმდეგ მიმდინარე ზეწოლებზე.

მისივე თქმით, ზოგადად, ეს არ არის პირველი შემთხვევა, როდესაც მოსამართლეები მათზე განხორციელებულ ზეწოლაზე საუბრობენ:

"ივანიშვილის ხელისუფლება პირველივე დღიდან აკეთებს ყველაფერს, რომ დაანგრიოს არა მხოლოდ თავისუფალი მედია, არამედ დაანგრიოს და დაეპატრონოს სასამართლო ხელისუფლებასაც. მე უნდობლობას ვუცხადებ გამოძიებას, ვინაიდან ამ წლების განმავლობაში, არც ერთი ის საკითხი, რომელიც საზოგადოებას აინტერესებს, დამაჯერებლად არ ყოფილა გამოძიებული. აქედან გამომდინარე, რუსთავი 2-ს გადარჩენა არის არა გამოძიების ხელში, ვინაიდან ისინი საკუთარ თავს ბუნებრივია არ გამოიძიებენ, არამედ ქართველი ხალხის და საერთაშორისო თანამეგობრობის ხელში."

2 თებერვალს, ცნობილი გახდა, რომ 2017 წლის 14 იანვარს, უზენაესი სასამართლოს მოსამართლეების, ბესარიონ ალავიძისა და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება. პროკურატურის ცნობით, მოსამართლეებმა ყოფილი სახელისუფლებო პირის სახელით მიიღეს SMS-ები.