ოპოზიციური პარტიების ნაწილის მიერ გავრცელებულ განცხადებაში ისინი მოუწოდებენ სახელისუფლებო გუნდს, დაუბრუნდნენ მოლაპარაკებების მაგიდას და გააცნობიერონ, რომ კრიზისიდან ერთადერთი გამოსავალი ვადამდელი, დემოკრატიული არჩევნების ჩატარებაა.

"ჩვენ დღესაც მივმართავთ ქართულ ოცნებას — დროულად დაუბრუნდეს მოლაპარაკებების მაგიდას და გააცნობიეროს, რომ კრიზისიდან ერთადერთი გამოსავალი ვადამდელი, დემოკრატიული არჩევნების ჩატარება და იმ საკითხების მოგვარებაა, რაც ოპოზიციას და შესაბამისად ამომრჩევლების უმრავლესობას აქვს დასმული. ასევე ვაცხადებთ, რომ მუქარა ოპოზიციური პარტიებისთვის საკანონმდებლო დონეზე სადამსჯელო სანქციების შემოღების შესახებ და მანდატების შეჩერების პროცესის გაწელვა არანაირ შედეგს არ გამოიღებს", — ნათქვამია მათ მიერ გავრცელებულ განცხადებაში.

როგორც ისინი აცხადებენ, მთავარი მოთხოვნები, რაც არჩევნების ჩატარების შემდეგ მოლაპარაკებების პროცესში ფიქსირდებოდა, განსხვავებების მიუხედავად, არ შეცვლილა.

"მიუხედავად დღევანდელი პარლამენტის მიმართ ბოიკოტის რეჟიმში მყოფ პარტიებს შორის არსებული განსხვავებებისა, ჩვენ საერთო პოზიცია და მოთხოვნები არჩევნების შედეგების გაყალბებიდან მალევე შევაჯერეთ - პოლიტპატიმრების გათავისუფლება, ახალი არჩევნები, ახალი საარჩევნო ადმინისტრაცია და საარჩევნო წესები, საარჩევნო სისტემის ცვლილება", — წერია განცხადებაში.

აღნიშნულ განცხადებას ხელს აწერენ შემდეგი პარტიები:

  • ლელო;
  • გირჩი — მეტი თავისუფლება;
  • ევროპული საქართველო;
  • სტრატეგია აღმაშენებელი;
  • საქართველოს ლეიბორსტული პარტია;
  • ბლოკი ძალა ერთობაშია — პროგრესი და თავისუფლება, ნაციონალური მოძრაობა, სახელმწიფო ხალხისთვის, რესპუბლიკური პარტია