საქართველოს პრეზიდენტის, სალომე ზურაბიშვილის განცხადებით, კავკასიის რეგიონში ძალების ახალი კონფიგურაცია აჩვენებს, რომ NATO-ს მხრიდან რეგიონის მიმართ უფრო მეტი ყურადღებაა საჭირო.

"NATO-საქართველოს თანამშრომლობა ახლა უფრო მეტ მნიშვნელობას იძენს, ვიდრე ოდესმე. ახალ გამოწვევებთან ახალი ენერგია, უფრო მეტი მოძრაობა და მეტი შემართება გვჭირდება. რამდენიმე ფაქტორი გვიბიძგებს ამ მიმართულებით. ძალიან მნიშვნელოვანია ის, რომ ამერიკის ახალი ადმინისტრაცია კიდევ ერთხელ მზად არის, დაადასტუროს თავისი კავშირები NATO-სთან და თავისი ყოფნა ჩვენს რეგიონში. ჩვენ ვნახეთ ძალების ახალი კონფიგურაცია რეგიონში, რომელიც გვაჩვენებს, რომ ახლა, ვიდრე არასდროს, კავკასია და შავი ზღვა მნიშვნელოვანი ხდება უსაფრთხოებისთვის და უნდა მიიპყროს უფრო მეტი ყურადღება NATO-ს მხრიდან", — განაცხადა ზურაბიშვილმა სტოლტენბერგთან შეხვედრის დასრულების შემდეგ გამართულ პრესკონფერენციაზე.

სალომე ზურაბიშვილი სამუშაო ვიზიტით ბრიუსელში 20 იანვარს გაემგზავრა. ვიზიტის ფარგლებში დაგეგმილი იყო შეხვედრები ევროკავშირისა და NATO-ს ხელმძღვანელ პირებთან.

გაიგეთ მეტი: