Vogue-მა კამალა ჰარისის სტილის დამცველთა აზრი გაითვალისწინა და ინაუგურაციის დღეს დააანონსა, რომ ჟურნალი კიდევ ერთი ყდით გამოიცემა, რომელზეც ახლადარჩეული ვიცეპრეზიდენტი იქნება გამოსახული, ჰარისის პირველ ფოტოს კრიტიკა მოჰყვა.

"ამ ისტორიული მომენტის აღსანიშნავად, სპეციალურ, ლიმიტირებულ გამოცემას #ინაუგურაციისდღის ნომერს მოვამზადებთ, რომელზეც კამალა ჰარისის ფოტო იქნება დატანილი", — დაწერა გამოცემამ ინსტაგრამზე და პოსტს ჰარისის ლურჯპიჯაკიანი ფოტო დაურთო.

თავდაპირველ ყდაზე ჰარისი შავი მოსაცმელით და კონვერსის კედებით არის წარმოდგენილი, გამოცემა ფოტოს დამუშავებისა და არაფორმალური სტილის გამო გააკრიტიკეს. გავრცელებული ხმების თანახმად, ვიცე-პრეზიდენტის არჩევანი მაიკლ კორსის ლურჯ პიჯაკში გადაღებული, ბევრად ფორმალური ფოტო იყო.

კამალას დიდებული გამარჯვების დაჩრდილვა არ გვსურდა — Vogue-ის რედაქტორის პასუხი კრიტიკას

რამდენიმე კვირის შემდეგ, ლურჯ პიჯაკში გადაღებული ფოტოს ყდაზე დაბეჭდვა გადაწყდა, მაგრამ ჟურნალმა დაანონსებასთან ერთად განცხადებაც გააკეთა და აღნიშნა, რომ ფოტო, რომელიც ლიმიტირებულ გამოცემაზე იქნება დატანილი, ციფრული ვერსიის ყდაზე ისედაც არის.

"Vogue-ის გუნდს ტაილერ მიჩელის ფოტოები მოეწონა და ჩავთვალეთ, რომ ნაკლებფორმალური ფოტო ჰარისის ავთენტურ, მეგობრულ ბუნებას უსვამდა ხაზს, რაც ჩვენი აზრით, ბაიდენისა და ჰარისის ადმინისტრაციის დამახასიათებელი ნიშანია. ამ ისტორიულად მნიშვნელოვანი მომენტის და ვიცე-პრეზიდენტის როლის აღსანიშნავად, ციფრულად ორის სხვადასხვა ყდა გავრცელდა", — ნათქვამია გამოცემის განცხადებაში.