ლელოს ერთ-ერთი ლიდერი, საბა ბუაძე ამბობს, რომ პოლიტიკურ სპექტრში მწვავე ოპონირება და ბულინგი ერთმანეთში არ უნდა აგვერიოს.

"თუ ვიღაცას აქვს განსხვავბული მოსაზრება და ამ განსხვავებული მოსაზრების გაჟღერებას ახდენს, ეს თუ ვინმეს ბულინგი გონია, მაშინ ქუდი დაიხუროს უნდა და სახლში წავიდეს. თუ ჩვენ არ შეგვიძლია, რომ ხშირ შემთხვევაში მწვავე ოპონირებას გავუძლოთ და ეს პროცესი ცივილიზებულ ჩარჩოში ვაწარმოოთ, მაშინ ამ ადამიანებს, ვინც თავს ასე დაბულინგებულად გრძნობს, მე მგონი ძალიან შეეშალა ის სივრცე, სადაც ისინი არიან", — განაცხადა საბა ბუაძემ რუსთავი 2-ის ეთერში.

ბუაძე ამბობს, რომ ბულინგი მისთვის სკოლაში არსებული ფენომენია და სისულელეა, ზრდასრულმა ადამიანებმა, კონკრეტულად კი პოლიტიკოსებმა, ერთმანეთის ბულნიგზე ისაუბრონ.

"ბულინგი ჩემთვის ყოველთვის იყო სკოლაში არსებული ფენომენი, სადაც ბავშვები აბულინგებდნენ ერთმანეთს. პოლიტიკურ სპექტრში ეს ბოლო რამდენიმე თვის შემოსული ტერმინია, რომ ვიღაცა ვიღაცას აბულინგებს. ეს რა სისულელეა საერთოდ. როგორ შეიძლება, რომ ზრდასრულმა ადამიანებმა, პოლიტიკოსებმა, ილაპარაკონ ერთმანეთის ბულინგზე?!", — ამბობს ბუაძე.

2020 წლის 31 ოქტომბრის არჩევნების შემდეგ შექმნილი პოლიტიკური კრიზისის განსამუხტად მიმდინარე მოლაპარაკებების პარალელურად, მმართველ პარტიაში აცხადებდნენ, რომ დიდი ოპოზიციური პარტიები პატარა პარტებს აბულინგებდნენ და მათზე ზეწოლას ცდილობდნენ, რათა მათ პარლამენტში შესვლაზე უარი ეთქვათ. ქართული ოცნების ერთ-ერთმა ლიდერმა, მამუკა მდინარაძემ პირდაპირ განაცხადა, რომ "ბულერი" პარტიები ერთიანი ნაციონალური მოძრაობა და ევროპული საქართველო იყვნენ.

მოქალაქეების ლიდერები, ალეკო ელისაშვილი და ლევან იოსეიანი ევროპულ საქართველოს პირდაპირ ადანაშაულებენ მოლაპარაკებების ჩაშლის მცდელობაში.

გაიგეთ მეტი: