დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, Covid-19-ზე დაწესებული შეზღუდვების მოხსნა ე.წ. თანდათანობითი შემსუბუქების პრინციპით მოხდება.

"2 დღის განმავლობაში ეტაპობრივი შემსუბუქების გეგმა უნდა შემუშავდეს, რათა ერთბაშად არ გაიხსნას ყველაფერი. მაგალითად, ერთი კვირა გაიხსნება რომელიღაცა ბიზნესი, 1 ან 2, კვირა დავაკვირდებით, რა შედეგს მოიტანს ეს. ამ დადებითობის ე.წ. მაჩვენებლითა და სხავდასხვა ინდიკატორის მიხედვით მივიღებთ გადაწყვეტილებას", — განაცხადა გამყრელიძემ.

კორონავირუსის შემთხვევების ზრდის გამო ქვეყანაში მკაცრო შეზღუდვები მოქმედებს. კერძოდ, საქართველოში პირველ თებერვლამდე შეზღუდულია:

  • 21:00 საათიდან 05:00 საათამდე პირთა გადაადგილება — როგორც ქვეითად, ისე სატრანსპორტო საშუალებით;
  • მგზავრების რეგულარული საქალაქთაშორისო გადაყვანა — მათ შორის, რკინიგზით, ავტობუსით, სამარშრუტო ტაქსით. მსუბუქ ავტომობილებზე (მათ შორის ტაქსებზე) შეზღუდვა არ არის;
  • რესტორნებისა და კვების ობიექტების მუშაობა — დასაშვებია მხოლოდ გატანის სერვისი და ე.წ. "დრაივი;
  • ფიტნესდარბაზებისა და საცურაო აუზების მუშაობა;
  • ყველა სახის კონფერენციის, ტრენინგის, კულტურული, გასართობი ღონისძიებების ჩატარება — დასაშვებია მხოლოდ ონლაინ ფორმატით
  • სპორტული, სახელოვნებო და კულტურული წრეების/სტუდიების საქმიანობა


გარდა ამისა, დიდ ქალაქებში და სათხილამურო კურორტებზე დაწესებულია დამატებითი შეზღუდვები. თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში და ასევე, ბაკურიანში, გუდაურში, გოდერძისა და მესტიაში:

  • იზღუდება მუნიციპალური ტრანსპორტის მუშაობა;
  • სავაჭრო ობიექტები (გარდა სურსათის, ცხოველთა საკვების, აფთიაქების, ვეტაფთიაქების, საყოფაცხოვრებო ქიმიისა და ჰიგიენის მაღაზიებისა, ასევე, პრესის ჯიხურებისა) მუშაობენ მხოლოდ დისტანციურ რეჟიმში;
  • ღია და დახურული ბაზრობები მუშაობენ მხოლოდ დისტანციურ რეჟიმში. ფუნქციონირებას აგრძელებენ აგრარული ბაზრები;
  • სკოლები, პროფსასწავლებლები და უმაღლესი საგანმანათლებლო დაწესებულებები (გარდა სამედიცინო საგანმანათლებლო პროგრამებისა) მუშაობენ მხოლოდ დისტანციურ რეჟიმზე;
  • კერძო და საჯარო საბავშვო ბაღები აჩერებენ მუშაობას.
  • გარდა ამისა, სათხილამურო კურორტებზე სასტუმროების მუშაობა დასაშვებია მხოლოდ საკარანტინო სივრცეების მოსაწყობად ჩერდება სათხილამურო ტრასებისა და სათხილამურო საბაგიროების ფუნქციონირება.

არ იზღუდება მსუბუქი ავტომობილით (მათ შორის - ტაქსით) გადაადგილება. ასევე, შეზღუდვები არ ეხება სხვა ეკონომიკურ საქმიანობას, მათ შორის:

  • სახელმწიფო და კერძო სამშენებლო-სარემონტო საქმიანობას;
  • საბანკო და საფინანსო საქმიანობას;
  • სურსათის, ცხოველთა საკვების, აფთიაქების, ვეტაფთიაქების, საყოფაცხოვრებო ქიმიისა და ჰიგიენის მაღაზიების, ასევე, პრესის ჯიხურების მუშაობას;
  • ე.წ. "დელივერისა" და გატანის სერვისებს;
  • სილამაზის სალონებისა და ესთეტიკური მედიცინის ცენტრების მუშაობას;
  • ავტოტექმომსახურებისა და ტექნიკური ინსპექტირების სერვისებს;
  • საყოფაცხოვრებო ტექნიკის სარემონტო სერვისებს;
  • აგრარული ბაზრობის მუშაობას.

18 იანვრის მონაცემებით, საქართველოში კორონავირუსის 110 ახალი შემთხვევა დადასტურდა, გამოჯანმრთელდა 1 643 ადამიანი, გარდაიცვალა — 25.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: