საერთაშორისო უფლებადაცვითი ორგანიზაცია, Amnesty International ალექსეი ნავალნის სინდიდის პატიმრად აღიარებს და რუსეთის ხელისუფლებას მოუწოდეს, დაუყოვნებლივ და უპირობოდ გაათავისუფლოს იგი.

Amnesty International–ის მოსკოვის ოფისის დირექტორის, ნატალია ზვიაგინას თქმით, ნავალნის დაპატიმრება კიდევ ერთხელ ადასტურებს, რომ რუსეთის ხელისუფლება მის გაჩუმებას ცდილობს.

"მისი დაკავება მხოლოდ ხაზს უსვამს, რომ აუცილებელია გამოიძიონ ბრალდება, რის თანახმადაც იგი სახელმწიფო აგენტებმა მოწამლეს [...[ რუსეთის ხელისუფლება ალექსეი ნავალნის ჩამოსვლას ისე მოუდგა, როგორც უსაფრთხოების ოპერაციას, რომლისთვისაც ასობით პოლიციელი იყო მობილიზებული აეროპორტში. იქ დააკავეს ნავალნის მომხრეები და -20 გრადუს ყინვაში გააძევეს", — განაცხადა მან.

მისივე განცხადებით, ნავალნის ყველა მხარდამჭერი და ჟურნალისტი, რომელიც აეროპორტში დააკავეს დაუყოვნებლივ უნდა გათავისუფლდნენ. რადგან ზვიაგინას თქმით, მათი ერთადერთი "დანაშაული" ის არის, რომ ალექსეი ნავალნისთან შეხვედრა სურდათ.

ორგანიზაციის განცხადებით, რუსეთის ხელისუფლებამ უნდა დაასრულოს დაშინებისა და პოლიტიკური დევნის კამპანია მათი კრიტიკოსების, მათ შორის, ნავალნის ანტიკორუფციული ფონდის წევრებისა და მხარდამჭერების მიმართ.

მოსკოვში დაბრუნებული რუსი ოპოზიციონერი, ალექსეი ნავალნი აეროპორტში დააკავეს. ინფორმაციას ამის შესახებ TASS სასჯელის აღსრულების ფედერალურ ბიუროზე დაყრდნობით ავრცელებს. განცხადებაში ნათქვამია, რომ ნავალნი 2020 წლის 29 დეკემბრიდან გამოსაცდელი ვადის მრავალჯერ დარღვევის გამო ძებნაშია.

ნავალნი აგვისტოში მოწამლეს. თავდაპირველად ის ომსკის კლინიკაში მკურნალობდა, თუმცა ორი დღის შემდეგ, ოჯახის მოთხოვნით გერმანიაში, შარიტეს კლინიკაში გადაიყვანეს. რამდენიმე ქვეყნის ლაბორატორიამ დაადასტურა, რომ ოპოზიციონერი ნოვიჩოკის ჯგუფის საწამლავით მოწამლეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.