ავღანეთში შეიარაღებულმა პირებმა უზენაესი სასამართლოს 2 ქალი მოსამართლე მოკლეს. ამის შესახებ ინფორმაციას პოლიციაზე დაყრდნობით Reuters ავრცელებს.

მედიის ცნობით, თავდასხმის შედეგად, ასევე, დაშავდა მათი მძღოლიც. როგორც ცნობილია, შემთხვევას უსაფრთხოების ძალები იძიებენ. თალიბანის წარმომადგენელმა განაცხადა, რომ აღნიშნულ საქმეში მათი წევრები არ მონაწილეობდნენ.

მომხდარს ავღანეთის პრეზიდენტი, აშრაფ ღანიც გამოეხმაურა და თალიბანისა თუ სხვა სამხედრო ჯგუფების მიერ მშვიდობიან მოქალაქეებზე თავდასხმები დაგმო. მისი თქმით, "ტერორი, შიში და კრიმინალი" ავღანეთის პრობლემების მოგვარების გამოსავალი არ არის.